Ulstein Ten Sing framfører nemlig songane sine live til eigenproduserte musikkvideoar. Dette er gjennomført så profft og godt synkronisert at ein absolutt må ha den digre skjermen på kulturhuset Sjøborg for å kunne vise det ordentlig fram.
Også det som i gamle dagar var «drama» har blitt delvis flytta over på skjermen. Å følgje facebook- diskusjonen til Ten Sing for å finne tema for konserten på storskjerm med høgtlesing av diskusjonen er eit artig grep.
Tema for konserten var Dreams Become Real, og ein av draumane var sikkert også å kunne fylle storstova i Ulsteinvik. Publikumet fekk innblikk i noko av det ungdom drøymar om: Ein rettferdig og sunn verden, eit samfunn der ein ikkje treng å vere kjendis for å oppleve aksept, vennskap og eit miljø "..who will catch you if you fall."
Den musikalske kvaliteten var svært høg, med både eit flott og velbalansert fleirstemt kor, og med dyktige solistar og instrumentalister, støtta av teknikkarar som kan sitt fag. Det var eit bredt spekter av musikalske stoff kombinert på ein spenstig måte. Det må ligge hundrevis av timer bak den flotte produksjonen av ulike videoar som gav TenSing- konserten ein heilt ny dimensjon.
Kombinasjon av live- framføringar og video har Ulstein Ten Sing jobba med i eit par år og dette har etablert seg som ein ny metodikk for Ten Sing- arbeidet i Ulstein. Og ein video frå «over dammen» viste at Ulstein Ten Sing har kjendisstatus i eit studentmiljø Fullerton, Florida også...
Kreativiteten, energien og engasjementet som vi fekk oppleve på Sjøborg vitnar om at Ten Sing- ideen blomstrar og lever i beste velgåande også meir enn 40 år etter det heile starta. Ved å leige kulturhuset for sin konsert tek Ulstein Ten Sing frimodig steget ut på den offentlege kulturarenaen. Dette blei full suksess med over 300 personar i publikum.
På bilde og videoar på storskjermen fekk vi sjå både Fredheim og Ulstein kyrkje mange gongar – dei to arena der Ulstein Ten Sing har si heimebane. Eit slikt engasjert ungdomsarbeid er ei kraftkjelde for kyrkja i Ulstein. Takk for ein strålande konsert!