Kristeles jielede Altesne
Gosse Saemien gærhkoebiejjide Altesne gaavnedibie mijjieh libie dajvesne gusnie kristeles jaahkoe lea tjïelke stïeresne orreme guhkiem. Altan akte gellielaaketje jaahkoeeatneme. Nöörjen gærhkoe ij ajve jarngesijjiem fysiskelaakan Nordlyskatedralen tjïrrh utnieh, aaj jeenjesh gærhkosne minnieh jïh gærhkoen dïenesjh nuhtjieh.
Altan pråastesåakne Nöörjen gærhkosne såaknide Loppa, Hasvik, Alta jïh Talvik feerhmie. Altan såakne, jallh åålmege, mij aaj gohtjesåvva, vïjhte gærhkoesijjieh åtna: Nordlyskatedralen Altan gærhkoe, Altan gærhkoe (båeries), Elvebakken gærhkoe, jïh gærhkoeh Kåfjordesne jïh Rafsbotnesne.
Altan åålmege lea stoerre åålmege gelliej darjomigujmie, joekoen vïedteldihkie Nordlyskatedralese. Lissine gyrhkesjimmide lea darjomh mahte fïerhten biejjien. Akte stoerre jaahkoelïerehtimmiebarkoe gaavnedimmiejgujmie dejtie jeenjemes aalteredåehkide. Såemies dejstie lea aaj Elvebakken gærhkosne, gusnie åajvahkommes lea gyrhkesjimmie fïerhten mubpien våhkoen. Altan åålmegisnie maanagospelekovre, gærhkoekovre, vijries skyllijemaanabarkoe (medtie 170 skyllijemaanah 2024!), bijpeletæjmoeh, jïh konserth jïh jeatjah öörnemh. Åålmegesavka Nordlyskatedralesne åtnasåvva gaskem jeatjah «gærhkoetåarjese», akte ræhpas gaavnedimmiesijjie duarstaj, ovmessie teemajgujmie.
Aaj akte barkoe turistide mij uvtemesth lea vïedteldihkie Nordlyskatedralese. Tjeallarisnie akte onne, interaktijve museume Goeksegi bïjre. Turistebarkoe dïenestem vadta ryöktesth såaknen åålmegebarkoen sïjse.
Lihke laavenjostoe Altan jïh Talviken såakni gaskem. Talviken såaknen hearra kontovrem åtna Nordlyskatedralesne jïh gaajhkh kapellanh dovne Altan jïh Talviken såaknine barkeminie. Talviken såakne lea Altafjovlen gåabpegen bielesne jïh dan leah govhte gærhkoesijjieh. Langfjorden gærhkoe Langfjordesne jïh Talviken gærhkoe luvliebielesne, Leirbotn gærhkoe, Storekorsnesen kapelle, Komagfjord gærhkoe jïh Rognsund gærhkoe Seilandesne.
Læstadijanen byjrese lea gaskoeh 1800-låhkoen raejeste aaj Altam baajnehtamme. Gellie jaepieh Nöörjen gærhkoe lea laavenjostoem åtneme Elvebakken læstadijanen åålmeginie (ELM) jïh Rafsbotn læstadijanen åålmeginie gyrhkesjimmiej jïh jeatjah öörnemi bïjre. Daej biejjiej ELM sov orre böönegåetiem geervehteminie jïh daelie tjåadtjoehtæjja jïjtse sakramentereeremen åvteste.
Normisjon jïh Altan åålmege hijven jïh ræjhkoes laavenjostoem åtneme gellie jaepieh. Pænstaåålmege Filadelfia lea aaj vihkeles jïh våajnoes åålmege mejnie Nöörjen gærhkoe ovmessie öörnegi bïjre laavenjostoe. Frikirken aaj gaerhteles åålmegem åtna jïh lea vihkele bielie Altesne. Det norske misjonsselskap aktijve voenges siebriem åtna, jïh Norges samemisjon jïh Indremisjonsselskapet aaj såemies tjåanghkoeh utnieh. Dah leah vïedteldihkie Normisjonen böönegåatan, Alta böönegåetie, Bossekopesne. Katolske gærhkoen lea kapelle Elvebakkesne, jaabnan gyrhkesjimmiejgujmie.
Doh jeenjemes dejstie bijjeli neebnesovveme åålmegijstie aaj faalenassh noeride utnieh, men KFUK/KFUM-gutnijh vihkeles areenine orreme gellie jaepieh. Aaj Laget (Nöörjen kristeles Studeente- jïh skuvlenoeresiebrie) såemies boelhkh eadtjohke barkoem åtna vaentjelen bïjre soptsestidh.