Dagfinn Høybråten

Dagfinn Høybråten gullá hárvenaš politihkkáriidda geat leat guođđán bissovaš luottaid iežas maŋis - olmmoš duogábealde borgguhanlága lea ovddidan ovtta dain deaŧaleamos doaibmabijuin Norgga álbmotdearvvašvuhtii ođđa áiggis. Diehtá man dehálaš lea ovddastit juoga masa jáhkká ja čađahit dan vaikko leat vuostálasvuođat. Ja erenoamážit čájehit midjiide buohkaide earáide maid lea vejolaš olahit máhtuin, ulbmillaš barggu ja gierdavašvuođa bokte! 
 

Høybråtenis lea guhkes jođihanvásáhus politihkas, hálddašeamis ja riikkaidgaskasaš organisašuvnnain, ja diehtá maid dat mearkkaša bidjat alcces čielga mihttomeriid máhtu vuođul, cegget joavkku vai oažžu bohtosiid ja doalahit dan čoahkis vuostálasvuođaid čađa dassážii go mihttomeriid joksá. 
Son lei guokte áigodaga dearvvašvuođaministtar, muhto lea maiddái leamaš bargo- ja sosiálaministtar ja stáhtačálli Finánsadepartemeanttas. Riikkaidgaskasaččat lei son máŋggaid jagiid máilmmiviidosaš boahkuhanlihtu Gavi njunušin. Mii jagi 2000 rájes lea gádjon badjel 17 miljovnna máná heakkaid go leat ožžon mánáidboahkuheami geafi riikkaide. 
Almmolaš bálvalusas son lea jođihan Norgga oadjohálddahusa, leamaš ráđđeolmmái ja direktevrra Gielddaid guovddášlihtus. Maŋŋá go lei stáhtaráđđi, stuorradiggeáirras ja Risttalaš álbmotbellodaga bellodatjođiheaddji, lei Høybråten Davviriikkaid generálačálli ja maŋŋil Girku Heahteveahki generálačálli. 
Jagi 2018 rájes gitta 2023 rádjái son jođihii stuoradiggái nammaduvvon kommišuvnna mii guorahalai sápmelaččaid, kvenaid, dáččasuopmelaččaid ja vuovdesuopmelaččaid dáruiduhttima. 

 

Mari Valjakka

Mari Valjakka lea nuortalaš báhppa Suomas eret. Jagi 2015 rájis lea son bargan báhppan Suoma ev.-lut. girkus. Maŋimuš guokte jagi Mari lea bargan prošeaktakoordináhtorin Sámit girkus-prošeavttas. Prošeakta lei duohtavuođa- ja soabahanproseassa birra Suoma ev.-lut. girku ja sámi álbmoga gaskkas.  

Mari Valjakkas lea stuorra beroštupmi ekumenihkkii, eamiálbmotáššiide ja dálkkádahkii. Son jođiha Girkuid máilbmeráđi eamiálbmotreferánsajoavkku ja lea oassin Lutheránalaš máilbmelihtu Climate Justice Policy Task Force-joavkkus. 

 

Johan Máhtte Skum

Johan Máhtte Skum lea oahppan girkomusihkkár, ja okta vuosttaš sámi girkomusihkkáriin gii vihahuvvui kántorbálvalussii Norgga girkus. Johan Máhtte bargá ráđđeaddin Sámi girkoráđis, Norgga girkus. Sus lea beroštupmi sámi girkomusihkkii, -sálbmalávlumii ja -árbevirolaš musihkkii. Johan Máhtte lea leamaš mielde pláneme 2013, 2017, 2022 (2021) ja 2025 Sámi girkobeivviid ipmilbálvalusaid. Dán jagi girkobeivviin bovde Johan Máhtte sálbmalávlunboddui lávvordaga geassemánu 28. Beaivve. 

 

Lovisa Mienna Sjöberg

Lovisa Mienna Sjöberg lea dutki ja vuosttašamanueansa VID dieđalaš allaskuvllas Romssas gos sus lea ovddasvástádus báhppaoahpahusa ovddas. Son nákkáhalai 2018 Oslo universitehtas nákkosgirjjiin man namma lea "Att leva i ständig välsignelse. En studie av sivdnidit som religiös praxis".  

Sjöberga dutkan čalmmustahttá vuoiŋŋalaš árbevieruid ja praksisiid Sámis, sámi muitalanárbevieru, árgabeaioskku ja sámi historjjá girku ektui. Son lea ovdal bargan prošeaktajođiheaddjin, allaskuvlalektorin ja vuosttašamanueansan Sámi allaskuvllas.  

Su almmuheamit siskkildit sihke dieđalaš ja populearadieđalaš artihkkaliid ja girjekapihttaliid ruoŧagillii, dárogillii, eaŋgalasgillii ja davvisámegillii. Su ovddimus dutkanberoštumit leat konstruktiivvalaš teologiija, ja áinnas relaterejuvvon sivdnáduskriisii mas mii leat dál, ja sámi girkohistorjá.    

 

 

Fredrik Juul

Fredrik Juul lea girkohearrá Máláge-Suorssá girkohearráguovllus, Ruoŧa girkus. Son lea maid proavás (kontraktsprost) Lulli-Sámi proavásgottis (kontrakt). Lagabut 25 jagi lea son bargan báhppan sierra searvegottiin Vyöddaleiednuo birra ja Ubmesámi guovllus, ja lea dainna lágiin oahppan ollu sámi girkoeallima ja sámi áššiid birra. Sámi girkobeivviin son galgá muitalit iežas vásáhusain mat gusket Christina Catharina Larsdottera máhcaheapmái Málágii miessemánus 2024.    

 

 

Kaisa Huuva

Kaisa Huuvas lea gullevašvuohta Gabná čerrui, Giron gildii ja Stockholmii. Badjel 20 jagi lea son bargan iešguđetlágán organisašuvnnain, nannet ja suodjalit sámi kultur- ja biraseallima, maid sámi girkoeallima. Son lea guhká beroštan jearaldagain sámi iešmearrideami, soabaheami ja dekoloniserema birra. Kaisa bargá dutkanprošeavttain mas guorahallá sámi bistevaš eallima ruoŧŧelaš áššan-koloniála eanadagain.        

 

Ida-Maria Marakatt

Ida-Maria Marakatt lea riegádan 1983. Son bajásšattai Saivomuotkkis, Gárasavvona searvegottis. Su sámi ruohttasat leat Gárasavvonguovllus ja mearrasámi guovllus Ivguvuonas, Davvi-Romssas.  

Ida-Maria lea duddjon nuorravuođa rájis ja lea oahppan árbevirolaš vuogi mielde, boarráset buolvvain. Sus lea maid oahppu Sámiid oahpahusguovddážis Jåhkåmåhkes. Doppe son válddii oahpu dipmaduojis, ja lei erenoamáš beroštupmi davvisámi duddjonmálliide. Ida-Maria hálldaša eanas dipma teknihkaid, muhto duddjon láiggiiguin, erenoamážit čuoldin, lea su váimmu lagamus.   

Otne orru bearrašiinis Ađevuomis. Bearaš gullá Lávnjitvuomi čerrui gos bargá bohccuiguin. Ida-Maria jođiha iežas duodjefitnodaga. Fitnodat čađaha diŋgojumiid, doallá gurssiid/oahpahusaid/bargobajiid ja vuovdá maid gárvves dujiid ja ávdnasiid. Árbevirolaš duodji lea Ida-Maria duddjoma guovddážis, muhto son ráhkada maid eará, nu dego girkotekstiillaid.  

 

Vesa Orassalo

Vesa Orassalo lea 24 jagi boaris ja lea eret Njauddâmis. Son studere vuođđoskuvlaoahpaheaddjin Roavvenjárggas. Sus lea plána máhccat ruovttoluotta nuorttas go geargá oahpuin.  

Olles eallima lea son ollu leamaš luonddus, ja bivdu ja guolásteapmi gullet su eallinvuohkái. Go lea luonddus vánddardan, de lea ollu erenomážit oaidnán ja vásihan. Dat lea su inspireren álgit govvemiin. Rievssat ja luossa leat erenoamáš dehálaččat sutnje, ja dat leat mielde hábmeme su eallima.