Ealli geađgi – Ealli girku  

Sámi girkobeivviid fáddá lea nana geađgevuođđu ja ahte mii geat gullat Kristusii -  gii lea ealli geađgi – leat maid ealli geađggit, ealli girku. 

«Go dii boahtibehtet su, ealli geađggi lusa, maid olbmot gal hilgo, muhto maid Ipmil lea válljen ja atná gudnis, de dalle dii iežage šaddabehtet ealli geađgin vuoiŋŋalaš vissui.» (1. Pet 2, 4-5) 

Kristtus lea ealli huksengeađgi maid Ipmil lea válljen, Mii ávžžuhuvvot boahtit Kristtusa lusa. Oskkudettiin Sutnje, ealli geađgái, leat mii ealli girku. 

Maid mearkkaša dat go mii leat ealli geađggit, ealli girku? Eallit lea leahket lihkadeaddjin. Dat mii eallá sáhttá juoidá ráhkadit, heivehit iežas, hábmet dálááiggi, boahtteáiggi ja birrasa. Sámi árbevierus lea guovddážis dat ahte iežas heivehit lundui. Sosiálalaččat sáhttá leat nu, ahte go olmmoš lea oassin ealli girkus, de dat duddjo olbmui duostilvuođa ja fámu. Ealli geađggit leat nannosat ja sáhttet rievdadit servodaga geađgevuođu eallinvejolašvuođaid. Jeagil han lea eatnama siste vuordime beassat šaddagoahtit 

«Juohkehaš gii gullá dáid mu sániid ja dahká daid mielde, lea dego jierpmálaš olmmái gii huksii viesus bávtti ala. Ráššoarvi šoallagođii, jogat dulve ja riđđu čuzii vissui, muhto dat ii gahččan, danne go dat lei huksejuvvon bávtti ala.» Matt 7, 24-25 

Go mii hukset bávtti ala, de sáhttit leat oadjebasat, go dalle viessu gierdá garra dálkkiid ja biekkaid. Su sánit ja lohpádusat leat bistevaččat buot dáhpáhusaid čađa, ja Son lea mielddámet buot daid dáhpáhusaid čađa maid mii vásihit.