På kyrkjekontora rundt om i bispedømet vårt heng det stiftskalendrar med kontaktinformasjon og oversikt over viktige hendingar for halvåret. Denne er i desse dagar på veg til å bli ferdig og klar til å sendast ut. Her på nettsidene finn ein og ein kalender som blir oppdatert etter kvart som nye hendingar kjem til.
Møte på Teams
I vår er det planlagt fleire inspirerande møte på Teams. Dette gjer at fleire kan delta utan å bruke tid, pengar og klimautslepp på reiser. To av desse handlar om konfirmantar og ungdom medan eitt er om kommunikasjon. Møta med fokus på ungdom er 11. februar og 20. mars. Kommunikasjonsmøtet er 20. februar. Då er temaet korleis vi kan kommunisere om påske i kyrkjelyden.
Fagdagar
Det er sjølvsagt og viktig å møte kvarandre fysisk. Fagdagar blir det både for undervisningstilsette, diakonar og prestar. I tillegg til årsrapportsamtalar for kyrkjeleg undervisning, blir det undervisningsfagdagar i Bergen 2. - 3. juni. Diakonar vil ha ein fagdag i Bergen 24. mars, og på stiftsmøtet 21. til 22. mai blir det fagdagar for prestane.
Fleire datoar på veg
Medan nokre ting er klare med tid og stad, er det andre hendingar som har førebelse datoar på stiftskalenderen. Då er kalenderen her på nettsidene ein god stad å halde seg oppdatert. Dette gjeld til dømes dei nemnde årlege samtalane om årsrapport for kyrkjeleg undervisning. For prostia Nordfjord, Sunnfjord og Sogn blir denne fagsamlinga 30. januar i Skei, men for resten av bispedømet blir samlingane ein gong i løpet av vekene 4 til 6 i Bergen og på Stord.
SOL-dagar
Biskopen og stiftsirektøren inviterer prostar og kyrkjeverjer til SOL-dagar, Saman om å leie-dagar, i prostia. Datoar for desse dagane blir sende til prostane og kyrkjeverjene direkte. Bergen vil få eit eige opplegg, resten av Hordaland har SOL-dagar 10.-13. mars og Sogn og Fjordane har sine dagar i september. På SOL-dagane vil ein sjå på ulike sider ved dei lokale tilhøva, ha faglege samtalar om utvilking, om korleis ein møter utfordringar og om kvar ein kan finne felles handlingsrom og støtte.
Hald av datoar til hausten
Det er meir frå hausten 2025 enn SOL-dagane i Sogn og Fjordane som vert annonserte på stiftskalenderen allereie no, slik at du kan halde av plass i kalenderen. Vegkryss, den årlege samlinga for ungdomsleiarar med ungdomsting blir i Bergen 29.- 31. august. To dagar i september, nærare bestemt 6. og 27. september blir det samråd/inspirasjonsdag for sokneråda i bispedømet.
Sjekk kalenderen!
I kalenderen finn du og datoar for bispedømerådsmøte, prostemøte og Ragnhild sine visitasar. Du finn og kurs for nytilsette, biskopens nyttårsmottaking, konferanse om "Kirkebevaringsprogrammet", leiarkonferanse og bibeldag med Bibelselskapet. Det er ingen grunn til å gå glipp av noko!