Kommunen med dei mange kyrkjebygg, har ikkje kyrkje i kommunesentrum i Åndalsnes, før no! Kyrkjetomta har lege der, og kyrkjeforeininga har arbeidd lenge og trufast for å realisere Åndalsnes kyrkje. No er eit viktig byggesteg realisert. På kyrkjetomta er reist alter og kors. I tillegg er kyrkjebenkene på plass og på denne måten er det viktigaste på plass for å invitere til «Åndalsnes kirke».
Bilete: Privat
Kommunen, som har «Verdens beste kommune for naturglade mennesker» som visjon, har vegger i verdsklasse og himmel som tak. I cortenstål, lerk og i rustfritt stål reiser kyrkjerommet sine mest vesentlege element seg. Nærværande, sentralt og samstemt med omgjevnadane er Åndalsnes kyrkje etablert, ope og tilgjengeleg for alle.
Her kan ein gifte seg, her kan ein feire gudsteneste, eller berre ha ei stille stund, Åndalsnes kyrkje er på plass og teken i bruk!
Sokneprest Tor Martin Koppang, saman med organist Yuliya Johnson, leia gudstenesta denne fine sundagsettermiddagen. Ei av bønene i forbøna for dagen lydde slik:
«Vi ber for alteret og korset på kirketomta som samler oss til bønn og lovsang. Vi ber at dette stedet kan fortsette å være et hellig sted i Åndalsnes. Vi ber for dem som samles til gudstjeneste her, de som går forbi på sin daglige tur, turistene og de tilreisende som finner frem til dette stedet. Skap tro og bygg deg et hellig folk av alle folk og tungemål som tilber og priser deg for alle dine velgjerninger.»
Så vil tida vise om det er grunnlag for å byggje vidare på kyrkja. «Åndalsnes Kyrkje» er på plass, men ingen veit enno om katedralen får andre vegger eller vanntett tak.
Sokneprest Tor Martin Koppang, saman med organist Yuliya Johnson, leia gudstenesta. Bilete: Privat