Under overskrifta Prest – der livet vert levd, var prestane i Møre og tilsette ved bispedømekontoret samla til Prestekonvent i Kristiansund 4.-6.oktober. Dette er ei samling som etter tradisjonen går av stabelen anna kvart år, der biskopen kallar inn til ei fagleg samling. Det var særleg flott at denne samlinga for første gong var lagt til Kristiansund.
Tema som vart handsama dette året var sakramentsforvaltning, krig på europeisk jord og palliativ omsorg.
Fullsatt: prestane i Møre og tilsette ved bispedømekontoret var samla til Prestekonvent i Kristiansund i oktober. Bilete: Møre bispedøme
Smøla
I tillegg vart det sett fokus på pilegrimsarbeidet og kystpilegrimsleia. Onsdag 5.okt tok heile gruppa turen til Smøla og besøkte kystpilegrimssenteret. Etter ei høgtideleg pilegrimsbøn i Edøy kyrkje fekk gruppa eit møte med skaparen av spelet «Fru Guri av Edøy» Peggy Kruse. Vidare var planen å besøke Kulisteinen og gå ei pilegrimsvandring tilbake til Edøy kyrkje, men her sette varsla hauststorm stopp.
Biskop Midttømme saman med Peggy Kruse, skaparen av spelet «Fru Guri av Edøy». Bilete: Møre bispedøme
Gjestar frå Ungarn
I år hadde bispedømet glede av å vere vertskap for ei gruppe på ni frå vårt venskapsbispedøme i Ungarn. Biskop Tamás kom saman med sju prestar og vald leiar av bispedømet. Den Lutherske kyrkja er ein liten minoritet i Ungarn, men med eit stort diakonalt engasjement. Nordre bispedøme i Ungarn ligg heilt ved grensa til Ukraina, og sidan krigsutbrotet har over 2 millionar menneske flykta denne vegen. Å høyre dei dele av sine erfaringar med dette arbeidet berørte oss alle.
