– Det har over tid vore etterspurt kurs i åndelege vegleiing. Difor vart det tatt eit initiativ i Bjørgvin bispedøme for å kome ynskje i møte, og vi er vi glade for at vi no kan tilby dette kurset, seier prest i Domkirken menighet i Bergen May Bente Matre. Saman med domprost Gudmund Waaler og personalprest i Bjørgvin, Bård Haukedal utgjer ho ei arbeidsgruppe som har arbeidd med kursplanane.
Ho trur eit slikt kurs vil vera verdifullt for deltakarane og kan vere ein inspirasjon til å søkje til kjelda for det som djupast sett ber trua og tenesta.
Kurset består av to fellessamlingar:
- Første kursveke - veke 42 2022 (frå 17. oktober) - blir hos St Joseph-søstrene på Grefsen.
- Andre kursveke – veke 12 2023 (frå 20. mars) - blir på Holmely omsorg- og retreatsenter på Bryggja i Nordfjord. Kursvekene er frå mandag kl. 12.00 til fredag kl. 12.00.
Mellom kursvekene blir det arrangert gruppesamlingar - digitale eller fysiske møte. Deltakarane skriv også refleksjonsnotat mellom samlingane.
Ignatiansk vegleiing
Emnet gir ei innføring i åndeleg vegleiing slik den kjem til uttrykk i den kristne tradisjonen. Den ignatianske vegleiingstradisjonen har fått størst merksemd i nyare tid, særleg i protestantisk samanheng, og vil vere mest sentral i emnet. Denne tradisjonen har vist seg nyttig som ei hjelp til å møte menneske sin lengt/søk etter ein spiritualitet/tru og som ei hjelp til eksistensiell fordjuping.
Studiepoeng
Kurset skal etter planen gjennomførast i samarbeid med NLA Høgskolen. Dersom nødvendige godkjenningar kjem på plass, vil ein få 15 studiepoeng etter gjenomført kurs.
Bjørgvin bispedøme vil dekka det meste av utgiftene for inntil åtte prestar på kurset. Det vil i tillegg vera plass til fem andre deltakarar. Det går an å søkja fellesrådet om støtte.
Kravet for å søkja plass på kurset er at ein har minst eitt års relevant arbeidserfaring frå arbeid i kyrkjelyd eller kristen verksemd, og utdanning på bachelorgrad-nivå eller høgare.
Søknadsfrist: 15. mai 2022.
Les meir om kurset via lenke nedst på sida. Der finn du også lenke til påmelding.