Bjørgvin bispegard var 16. august arena for det fyrste styremøtet i Kyrkjekultur Vest AS, som har Den norske kyrkje: Bjørgvin bispedøme og Bergen kirkelige fellesråd som eigarar.
Etableringa har som formål å synleggjere og styrke den kyrkjelege kulturkompetansen i heile bispedømet og utvikle kyrkja som kulturaktør og kulturarena.
Hovudoppgåvene er:
- Vere eit nettverk for kompetansedeling
- Kyrkjeturnérådgjevar: Vidareformidle aktuelle produksjonar
- Etablere alliansar og samarbeid mellom kyrkje, kulturliv og andre samfunnsaktørar
- Vere ein ressurs for større utoverretta prosjekt i bispedømet
- Initiere tiltak for kulturfagleg kompetanseheving i møte mellom kunstnarar og kyrkjelydar
- Legge til rette for kyrkjelege kulturskuletilbod
Styreleiar Sissel Vartdal (biletet under), til dagleg kyrkjeverje i Sunnfjord, leia det konstituerande møtet, som la grunnlaget for korleis styrekollegiet saman kan sikre at selskapet klokt kan sikre at formål og målsetjing vert realisert.
Dei andre styremedlemmane er Ragnhild Jepsen, biskop i Bjørgvin, Lise-May Sæle, student og fylkestingspolitikar (H) frå Balestrand, Karl Johan Kirkebø, pensjonist, medlem i Bjørgvin bispedømeråd og Kirkerådet, Kjetil Almenning, domkantor i Bergen domkirke og Ragnhild Margrethe Gudbrandsen, skodespelar.
Vartdal har takka ja til styreleiarvervet, fordi ho har stor tru på at samspelet mellom kyrkje, kultur og samfunn har uforløyst potensiale.
- Styret har starta ein spennande samtale om korleis etableringa av Kyrkjekultur Vest skal bidra til å løfte den kyrkjelege kulturkompetansen i bispedømet vårt. Innsteget vårt er todelt; vere medvitne og stolte over alt det gode kulturarbeidet som skjer i kyrkjelydane i regi av tilsette og frivillige, og samstundes tenke nytt - og større - for å samhandle, dele og utvikle dette vidare. Kyrkja er allereie ein tung kulturaktør, med ein viktig brubyggjarfunksjon mot folk og samfunn. Som nyetablert styre er dette meiningsfylt å få arbeide med, avsluttar Vartdal.
