Kurs i kyrkjeleiing saman med den engelske kyrkja

I overgangen august-september var prestar frå England og Noreg, samt ein student ved NLA, samla i Bergen i tre dagar for å starte på kurset "Leading ecclesial change and growth in contexts ". Bård Norheim, professor i teologi ved NLA Høgskolen, leier kurset saman med Nick Shepherd som er førsteamanuensis og arbeider i Church of England med frivilligheit og nye former for å vere kyrkje. 

 

Shepherd fortel oss at det ti veker lange kurset er for prestar, prostar og andre kyrkjelege leiarar og at det handlar om å leie endring. Bjørgvin og Soutwark i London er venskapsbispedøme, og det var her samarbeidet om kurset starta. I år er og venskapsbispedøma Møre og Newcastle med, og i neste omgang, om to år, er planen at Stavanger og Carlisle og er med.

 

Praktisk kurs for leiarar

- Dette er ein måte å knytte venskapsbanda på, fortel Shepherd.  - Det er eit praktisk kurs for våre leiarar, og gi dei ein sjanse til å danne eit læringsfellesskap, til å snakke om utfordringane sine og korleis ein nærmer seg utfordringane. Det handlar og om kva nye ting kyrkja gjer for å vekse og lære.

Norheim synes og det er bra å ha eit samarbeid mellom den norske og den engelske kyrkja om eit slikt kurs.

- Det spennande med å samla prestar frå Den norske kyrkja og Church of England, seier han, - er at vi har nok til felles til at vi har noko å snakka om, og nok er ulikt til at det blir spenn og dynamikk i samtalen om kva det vil seia å leia kyrkja i ei tid med store endringar, særleg når det gjeld kyrkja sin posisjon og rolle i samfunnet.

På den tredje dagen av kurset var biskop Ragnhild til stades for å fortelje om ståa i kyrkja i Noreg. Ho snakka mellom anna om kyrkja i det offentlege rom og kor viktig det er kva ord ein vel i det offentlege rommet.

Nytt kurs i 2025

Ei av dei som deltok på kurset, er den ferske prosten i Bergensdalen Maren Flotve Tischendorf. Ho er glad ho starta på dette kurset.
- Dette er veldig interessant, seier ho, - Det er praksisnært, og vi får ta med problemstillingar vi har i kvardagen for å drøfte dei med andre. Og så handlar det om å vere kyrkje i ei tid i endring.

Dei neste ti vekene skal kursdeltakarane sjå forelesningar på nett og levere oppgåver, før dei avsluttar kurset i London.

Etter planen vil eit nytt kurs starte opp hausten 2025. Prestar, prostar og andre som er interesserte i å vere med då, kan kontakte Tore Skjæveland. Kontaktinfo finn du nedanfor.