Kva skjer på bibelkveld?
På bibelkveldane samlast vi rundt bordet i kontorfløya i Solheim kyrkje. Vi tek oss gjerne litt kaffi/te på førehand. Så bed eg ei kort opningsbøn, og deretter les vi saman ein bibeltekst som vi vil sjå på den kvelden. Så har eg ei innleiing der eg legg fram nokre av mine tankar om teksten. Eg har på førehand lese i eit kommentarverk, og hentar ting derifrå (men det treng ikkje du å gjere). Så snakkar vi saman om det som måtte interessere, og du kan delta så mykje eller lite du vil. Til slutt ber vi gjerne litt saman igjen.
Vi er ein liten gjeng som har gjort dette i nokre semester no, det er nokre vanlege menneske som du kanskje kjenner. Denne våren tek vi føre oss Ruts bok.
Ruts bok
I denne korte, men gripande forteljinga frå Det gamle testamentet i Bibelen står to kvinner i fokus: Rut og hennar svigermor Noomi. Vi får høyre korleis store tragediar rammar dei, men også korleis Rut – gjennom ei uventa gudstru og stort pågangsmot – vender situasjonen for dei begge.
Som ein del av mi førebuing kjem eg til å lese i ei bok av Carolyn Custis James: The Gospel of Ruth. Det treng ikkje du å gjere, men er du interessert, så kan ein få boka både på papir, som e-bok og som audio-bok. Sjå lenkjer under. Kanskje les eg også ei anna bok.
Samlingane
Vi tek sikte på å ha samlingar annakvar veke på tysdagskveldar, i håp om at det passar for flest muleg:
- Stad: Møteromet i kontorfløya i Solheim kyrkje, Hordagt. 28. Gå inn hovudinngangen til kyrkja, inn i kyrkjeromet, og gjennom døra til kontorfløya.
- Tid: Annankvar tysdag kl. 18:30–20:30. Vi avsluttar evt. før viss vi synest ferdige.
- Datoar: 9. januar, 23. januar, 6. februar, 20. februar, 5. mars,
19. mars, torsdag 4. april, 16. april, 30. april.
Ta med eigen bibel om du kan! Vi har også nokre i kyrkja. Det er også muleg å lese Bibelen på mobil.
Alle kan vere med. Du treng ikkje vere bibellærd. Velkomen!