Streaming av gudstenesta ligg på facebook sida "Kyrkja i Aurland". Lenk til gudstenesta ligg nederst på denne sida.
For nokre år sidan hadde me gudsteneste på Ægir i Flåm, og no skal me ha gudsteneste på Trudvang kino.
I kyrkjene er det no berre mogleg å ha max 10 personar i gudstenester i tillegg til medvirkande. Grunnen er at fastmonterte benker ikkje vert rekna som «fastmonterte seter». I store, luftige Vangen kyrkje kan me difor ikkja eingong ha 1 person på kvar av dei 3 meter lange benkene. Difor tek me no grep for å få plass til fleire personar utan å «gå på akkord» med smittevern og tryggleik. Me legg opp til 2 meter avstand mellom deltakarane slik at dei kan ta del i salmesongen, og me har sjølvsagt håndsprit ved inngangen. Me fører pålagd namneliste som kan leggast fram ved evnt. smittesporing. Denne lista har me no ført i mange månader, men me har heldigvis aldri hatt bruk for ho. Lista skal oppbevarast i 2 veker før ho vert makulert.
Aurland har nokre år hatt tradisjon med «Kjærleiksgudsteneste» i samband med Valentindag, men denne gongen vert det temagudsteneste «Kjærleik i koronatider». Ein kjærleik som gjeld alle aldersgrupper. Me legg stort fokus på kjærleiken menneska imellom og mellom menneske og Gud.
Gudstenesta er ved prest John Ove Thaule og det vert solosong ved vår vikarorganist Ellen Marie Selland Geithung og songlærar Øyvind Ottesen frå musikk- og kulturskulen i Aurland.
Ut frå tilrådingar frå FHI/regjeringa, so vert gudstenesta berre for innbyggjarar i Aurland kommune, men me ynskjer alle dei velkomne. I alle fall til me når grensa for kor mange det er plass til med nødvendig avstand. Kor mange det då er plass til, kjem an på kor mange som kan sitje tett og kor mange som må ha avstand. Det kan hende at me streamar gudstenesta og deler på kyrkja i Aurland si facebookside, men det er ikkje heilt bestemt enno.
Problemstillinga på «fastmonterte benker» i forhold til «fastmonterte seter» er noko som KA (kyrkja sin arbeidsgjevarorganisasjon) jobbar med opp mot departementet, og som me håpar vil løyse seg etterkvart. Skulle me vere so heldige at det er endringar i dette regelverket ein av dei næraste dagane, slik at me kan ha fleire i kyrkja, so kan det vere at gudstenesta vert i Vangen kyrkje. Det vil i so fall bli formidla so godt me klarar bl.a. med plakat på døra og via nettsider og Facebook. Men slik det ser ut no, so vil du få oppleve ei gudsteneste i kinosalen til Trudvang kino.