Fredag 4. april er det et år siden Tor Martin døde.
Minneord som ble publisert i 2024 i Vårt Land, Aftenposten, Dagen og RB
Tor Martin Synnes til minne
Med Tor Martin Synnes sin altfor tidlege bortgang har Fjellhamar menighet i Lørenskog i Akershus mista ein strålande sokneprest.
Etter studium i teologi på MF Vitenskapelige Høyskole var Tor Martin Synnes (fødd 28.10.1967) i ni år studentprest i Navigatørene. Han var deretter vikarprest og lærar før han kom til Fjellhamar i 2007.
Med stort pågangsmot, eit breitt smil og ei levande gudstru gjekk Synnes inn i alle slags oppgåver. Han sette seg ned med menneske over ein open bibel og møtte sårbare menneske i djupe kriser. Han lærte preike-tekstar utenat. Han knytte sterke band til lokalmiljø og idrett.
Synnes var oppteken av klima og miljø - for Guds skaparverk – og å engasjera kyrkja for misjon, fred og rettferd.
Det strålte livsmot av Synnes, også i livets motbakkar. I 2011 blei han ramma av leukemi. Synnes som blei frisk etter beinmergs-transplantasjon, kom tilbake med full kraft i arbeidet. Merke i Birken klarte han etter sjukdommen.
For kring eitt år sidan fekk Synnes påvist spiserøyrskreft. Behandling syntes å gje resultat – under kontroll i fjor haust blei det ikkje funne spor av kreft. På nytt kom Synnes tilbake, like energisk.
Livsmotet tok Synnes vare på også etter at sjukdommen diverre kom tilbake. Til det siste var han oppteken av familie, vener og kyrkjelyd. Synnes døydde 4. april i år.
Ein brutal sjukdom ramma, totalt urettferdig, vil vi seia. Men Synnes avviste at han var ramma urettferdig. Han levde som han lærte og døydde som han lærte.
Tankane våre går til kona Eli, tre barn, to barnebarn og resten av familien.
Vi minnest Tor Martin Synnes i smertefull sorg – og med glede og takk: Energisk i alt. Omsorgsfull i alt. Smilande i alt. Sjølv-uhøgtidleg i alt. Levande tru i alt. God kollega i alt. God ven i alt.
Vi lyser fred over Tor Martin Synnes sitt gode minne.
Solrun Tjøstheim og Johannes Morken, noverande og tidlegare leiar i Fjellhamar menighetsråd.
Lenke til Tor Martins begravelse (Du må spole et stykke fram for å komme til starten)