Kyrkja har eit spesielt ansvar i ein slik situasjon, da dei aller fleste ynskjer kyrkjeleg seremoni, og gravlegging oftast skjer på ein gravplass.
Kyrkja i Lesja ynskjer å møte dei pårørande med forståing og omsorg, gjeva god rettleiing om gravferda generelt, og ei verdig gravferd for alle.
I "Alminnelige bestemmelser for gravferd", vedteke av Kyrkjemøtet i 2002, heiter det at handlinga gravferd er fellesskapet si siste teneste overfor sine medlemmar. Når ein person er død, sørger dei som stod den avdøde nær, vanlegvis familie, for at han/ho får ei verdig gravferd. Det grunnleggjande kring ei gravferd er gjeve i gravferdslova.
Gravferd, etter Den norske kyrkja si ordning, skal vera ei kyrkjeleg handling av gudstenestleg karakter, og det er reglar for kva ein gravferdsseremoni skal innehalde.
Lesja kyrkjelege råd har utarbeidd reglar og retningsliner for korleis ei gravferd skal administrerast og gjennomførast i Lesja. Desse er heilt i tråd med tidlegare tradisjonar her.
Vi meiner at desse reglar og retningsliner vil vera greie å ha for dei pårørande, for gravferdsbyråa, og ikkje minst for dei kyrkjeleg tilsette.
Reglar og retningsliner er vedteke av Lesja kyrkjelege råd i møte 19.02.2025 og gjeld frå same dag.
Dei er sendt ut til gravferdsbyrå i Lesja, Dovre og Rauma til orientering.