Biskop Ingeborg Midttømme sin nynorsk-salme
Feiring av den nynorske salmetradisjonen ♫
Den nynorske salmen er levande i mange, frå vogge til grav - som ein stor rikdom. I år er det 150 år sidan det første nynorske salmeheftet Nokre Salmar, gamle og nye (bildet) blei gitt ut. Mannen bak heftet var Elias Blix. Han sprengte rommet for kva språk offentlege religiøse tekstar kunne skrivast på, og no 150 år etter er det som ein gong var kontroversielt ein sjølvsagt del av dei norske kyrkjeromma. Mange av dei mest kjende nynorske salmediktarane har sine røter frå vårt område.
Møre bispedøme ønskjer saman med Nynorsk kultursentrum å feire den nynorske salmetradisjonen som ein del av Bokåret 2019.
– Møre bispedøme markerer 150 år med nynorsk salmar med å oppmode kyrkjelydane til å ha eit særleg fokus på dei nynorske salmane dette året. Vi utfordrar også kjende personar i bispedømet til å dele sin salme, seier biskop Ingeborg Midttømme, som er først ute med sin salme i Salmestafetten.
– Nynorske salmar er ein stor rikdom for mange. Salmane lever i den enkelte av oss, i familiar og i bygder og landsdelar. Den nynorske salmen er noko stort å få vekse inn i, og den følgjer oss heile livet, seier biskopen.
Biskop Ingeborg Midttømme sin nynorsk-salme