GUDSTENESTER I PÅSKEVEKA
Palmesøndag, Hareid kyrkje kl 11.00
Skjærtorsdag, Hadartun kl 17.00.
Skjærtorsdag, Hareid kyrkje kl 19.00.
Langfredag, Hareid kyrkje kl. 19.00.
Påskeaftan, Ulstein kyrkje kl. 23.00.
1. påskedag, Hareid kyrkje kl. 11.00.
(Sjå heile programmet lenger ned på sida)
Vi får i denne tida bli med Jesus til den siste nattverd, sjå hans liding og død og så få oppleve oppstoda. Desse dramatiske dagane er heilt avgjerande for at det fins ei kristen tru og kyrkje. Det at Jesus døydde og sto opp frå dei døde, er grunnlaget for at folk fylgjer etter Jesus den dag i dag. At han døydde for vår skuld, og viste seg sterkare enn døden, gjer han til noko meir enn ein læremeister.
Det er det som gir oss eit håp om evig liv.
Å følgje rytmen i påskedagane gjer noko med ein. Skjærtorsdag vert det i forlenginga av gudstenesta eit fellesmåltid før alterbordet vert duka av og lysa sløkte i kyrkja.
Vi går inn i landfredagstimane. Påskeaftan er det påskenattmesse i Ulstein kyrkje. Det er ei stemningsfull og vakker gudsteneste, ta deg gjerne tid til å bli med der.
Så kjem endeleg påskemorgon med påskesalmar og jubel.
Etter kyrkjeklokkene har ringt inn til festgudsteneste, kjem prestane fram i kordøra og ropar ut: Kristus er oppstaden. Kyrkjelyden svarar: Ja, han er sanneleg oppstaden. Kristus er oppstaden. Kyrkjelyden svarar: Ja, han er sanneleg oppstaden.
Då feirar vi at Jesus vann over døden og sto opp og lever - slik at vi ved trua på han også skal leve det evige liv.