Like gamal som mange stavkyrkjer
Valdres blir gjerne kalla «Stavkyrkjedalen». Her står seks av dei 28 bevarte stavkyrkjene i Noreg, og dei vart bygde i same periode som Ulnes kyrkje som er frå rundt året 1265. Kalkmåleria inne er frå slutten av 1700-talet, og dei vart restaurert i 1953-54. «Det er sjeldan ein ser slike måleri i såpass god stand som i Ulnes kyrkje», sier Susanne Kaun i samtale med kyrkjeverge Aud-Karin Hovi. Kaun er konservator for veggmåleri og arkitekturoverflater i NIKU. Saman med kollega Thomas Ragazzon Smestad som er er måleri- og muralkonservator arbeidde ho i fleire timar onsdag ettermiddag med å vurdere kyrkjerommet og måleria spesielt i Ulnes kyrkje.
Kanskje tilskottsordning i framtida?
NIKU kartlegg veggmåleri i mange slike steinkyrkjer no på oppdrag frå Riksantikvaren. Vi får tilsendt tilstandsrapporten for Ulnes når den er ferdig, utan at det kostar kyrkja i Nord-Aurdal noko. I dag er det inga tilskottsordning for å restaurere eller ivareta slike veggmåleri. «Sjølv om måleria i seg sjølve er i god stand i Ulnes, er dei i mykje dårlegare forfatning bak enn vi trudde», seier Smestad. Ei lita rift dersom nokon er uheldige å kome borti, kan få store flak av måleria til å falle av. Så her er det naudsynt å få gjort noko i løpet av få år. Kaun seier at dette ikkje er eineståande i Ulnes. «Vi veit at det skal svært spesiell kompetanse til for å å utføre restaurerings- og bevaringsarbeid på kalkmåleri. Og vi kan berre vone at det kjem på plass tilskottsordningar for å ta vare på desse unike måleria i framtida. Smykker som er i dagleg bruk, må ein både ta vare på og i blant få pussa opp. Slik også med Ulnes kyrkje,» avsluttar Hovi.