Heejja, daelie guhkiem mænngan datnem vuajneme?

Lij jåvli, aktene juvlemisnie jallh hïejesne dæjmetje giesien? Jallh dagke daamtaj gærhkosne mïnnh?

Saaht guktie gærhkoe edtja akte sijjie årrodh gusnie jaehkebe jïh jueriedibie, ussjedadtebe jïh soelkehtassem gaavnebe – akte tjiehtjele dutnjien.

Daesnie mijjieh ”jaavoe” jiehtebe dïsse mejnie edtja pruvredh, jïh mijjen maanah kristebe. Daesnie mijjieh mijjen gearehkigujmie gåvnahtibie, diekie mijjieh båetebe gosse vuastadahkh fer leevles sjidtieh.

Gærhkoe edtja akte tjiehtjele dutnjien årrodh dov voengesne.

Man åvteste dam dutnjien tjaelebe?

Jovven, juktie goh lïhtsege Nöörjen gærhkosne dov lea steemmereakta gærhkoeveeljemasse skïereden 8.–9. b.

Aelhkie ij gærhkoen bïjre pryöjjedh, men gosse steemmedh dellie vuesehth datne aktem gærhkoem sïjhth mij lea desnie dov gaavhtan. Gosse dam daarpesjh. 

Gærhkoeveeljemisnie datne kandidaatide steemmedh åålmegeraaran jïh bïspedajveraajan jïh Gærhkoetjåanghkose. Dah veeljesuvvieh akten boelhkese mij vaasa njieljie jaepieh, jïh leah meatan moenedh guktie gærhkoe edtja laavenjassh prioriteradidh desnie gusnie datne årroeh jïh abpe laantesne.

Tjaangh kirkevalget.no juktie vielie bïevnesh lohkedh kandidaati bïjre mejtie maahtah steemmadidh.

Gåessie jïh gusnie maahtah steemmadidh?

Gærhkoeveeljeme lea seamma aejkien goh tjïelteståvroe-jïh fylhkendigkieveeljeme skïereden 8.–9. b., aktene lokaalesne lokaaleveeljemen lïhke. Maahtah åvtelhbodti steemmadidh mïetsken 10. b. raejeste.

Bïevnesh dov veeljemelokaalen bïjre gaavnh veeljemekåarhtesne mij lea daan tjaalegen baalte jïh sijjesne kirkevalget.no.

Gïeh maehtieh steemmadidh?

Lïhtsegh dehtie Nöörjen gærhkoste mah såaknesne årroeh steemmereaktam utnieh dan jaepien raejeste gosse 15 jaepieh illieh. Kristemen tjïrrh lïhtseginie sjædta Nöörjen gærhkosne.

• 3,7 millijovnh lïhtsegh
• 61 000 gyrhkesjimmieh jaepien 2018
• 1,6 millijovnh almetjh lin konsertine jallh kultuvreöörnedimmine jaepien 2018.
• 5,3 millijovnh almetjh lin meatan gyrhkesjimmesne akten aejlegen jallh jeatjah bissiebiejjien jaepien 2018.

Naemhtie gærhkoe årganiseradamme

Åålmegeraerie

Åålmegeraerien åejvielaavenjasse lea åålmegem hammoedidh jïh evtiedidh. Dah gaajhkesi åvteste muenieh mah leah åålmegisnie dej suerkiej sisnjeli goh hokse jïh diakonije, gyrhkesjimmie, kultuvre, ööhpehtimmie jïh darjomefaalenassh smaave jïh stoerre almetjidie.

Bïspedajveraerie

Bïspedajveraerie lea dïhte regijonaale stuvremeårgaane Nöörjen gærhkosne. Dej lea barkoevedtijedïedte  hearraj åvteste jïh gærhkoen buaratjommesasse berkieh abpe bïspedajvesne. Nöörjesne ållesth luhkieakte bïspedajveraerieh.

Gærhkoetjåanghkoe

Lïhtsegh bïspedajveraerijste leah Gærhkoeraerie, Saemien gærhkoeraerien åvtehkinie ektine. Gærhkoetjåanghkoe lea Nöörjen gærhkoen bijjemes representatijve årgaane jïh tjåanghkene ikth jaepien.

Naemhtie darjoeh gosse edtjh steemmadidh:

Veeljemebåvvesne

1. Veeljh steemmeleahpide datne sïjhth nuhtjedh, akte fïerhten veeljemasse. Maahtah aktene jallh gåabpegen veeljemisnie steemmedh.

2. Darjoeh eventuelle jarkelimmieh steemmeleahpide

3. Mårhtjoeh steemmeleaphide olles naaken vuejnieh maam datne leah steemmadamme.

Veeljemebarkijen luvnie

4. Tjoerh legitimasjovnem vuesiehtidh. Veeljemebarkije kroessem beaja dov baalte almetjelåhkosne jïh steemmeleahpide steempelde. NB! Steemmeleahpah tjuerieh steempelem utnedh juktie jååhkesjamme sjïdtedh.

5. Biejjh- steemmeleahpide veeljemegeegken sïjse.

Jarkelimmieh steemmeleahpesne

A Maahtah steemmeleahpam deelledh bielelen jarkelimmieh darjodh. Kandidaath mah bijjemes tjåadtjoeh læstosne tjeehpebe bokstaavigujmie steemmelissiehtassem åadtjoeh. Gaajhkh jeatjah kandidaath fïereguhte aktem steemmam åadtjoeh.

B Maahtah persovnesteemmam vedtedh golme kandidaati raajan gosse mïerhkem bïejh kandidaaten nommen baalte.

C Veeljemisnie bïspedajveraaran maahtah dov steemmam vedtedh golme kandidaati raajan jeatjah læstojste. Veeljemisnie åålmegeraaran aktine læstojne maahtah raajan golme veeljedihks almetjh såaknesne bæjjese tjaeledh.

Veeljemekåarhte

Daate veeljemekåarhte lea faamosne Gærhkoeveeljemasse 2019. Lïhtsegh Nöörjen gærhkoste steemmereaktam utnieh dehtie jaepeste dah 15 jaepieh illieh.

Åvtelhbodti steemmadidh?

Datne maahtah åvtelhbodti steemmadidh mïetsken 10. b. raejeste skïereden 6. b. raajan. Vielie bïevnesh tïjjen jïh sijjien bijre bæjhkoehtamme sjidtieh voengesne jïh sijjesne kirkevalget.no.

Sïjhth steemmadidh aktene jeatjah såaknesne goh desnie gusnie årroeh, tjoerh dam darjodh skïereden 2. b. åvtelen.

Lïhtsegestatuse

Daate veeljemekåarhte seedtesåvva lïhtsegidie Nöörjen gærhkosne. Gïehtjh mejtie datne lïhtsege jïh darjoeh jarkelimmieh sijjesne kirken.no/medlem jallh gaskesadth åålmegekontovrem desnie gusnie årroeh.