Bjørgvin bispedøme

Bønnelista vil vidareføre den kristne tru og tradisjon som Den norske kyrkja har vore tufta på sidan reformasjonen.  Bibel og vedkjenning er og skal vere kyrkja sitt grunnlag.  Den norske kyrkja skal vere ein del av Guds synlege kyrkje på jord, med medlemmer som har Jesus som Herre, og med lokalstyrte kyrkjelydar med leiarar som let seg leie av Den Heilage Ande og som søkjer Gud i bøn og tilbeding. Bli kjend med kandidatane på www.bonnelista.no

Frimodig kyrkje ønskjer ei kyrkje som er trufast mot Guds ord, open og evangeliserande. Målet er å nå dagens menneske med evangeliet og utrusta til å følgja Jesus i kvardagen. Kyrkja blir bygd nedanfrå og gudstenestene er pulsslaget. Vi vil gje den lokale kyrkjelyden større ansvar, redusera sentralstyring og byråkratisering og gje rom for kyrkjelydar med ulik profil. Vi vil stimulera til levande fellesskap nær Jesus og nær menneske. Vi ønskjer å styrka arbeidet med søndagsskule og trusopplæring, bibelundervisning og Alphakurs, evangelisering og omsorgsarbeid. Vi vil arbeida for trygge og sunne rammer for born og unge i ei grenselaus tid. Når det gjeld styringa av kyrkja, ønskjer Frimodig kyrkje å endra valordninga i kyrkja bort frå eit polarisert partisystem.
Ein nærare presentasjon av kandidatane våre finst på www.frimodigkirke.no/bjorgvin

Nominasjonskomiteen si liste er kyrkjelydane si felles liste. Ho er sett opp av ein nominasjonskomite med eitt medlem frå kvart prosti, valt av sokneråda, i tillegg til ein representant frå ungdomsrådet.
Listekandidatane er forslag frå sokneråda, ungdomsrådet og nominasjonskomiteen sjølv og komiteen har mellom anna vektlagt kandidatar som er opptekne av at kyrkja sitt arbeid skal vera lokalt forankra, i sokna. 
Lista representerer ingen organisasjon eller interessegruppe. Saman vil me arbeida til det beste for den lokale kyrkja.
Du kan lesa meir om nominasjonskomiteen sine lister og dei enkelte kandidatane på https://nominasjonskomiteen.no

Sidan starten i 2014 har Open folkekyrkje gjort det vi kan for at Den norske kyrkja har vorte meir open for eit mangfald av menneske med ulike liv og livsrøynsler. Vi har mellom anna sytt for at også likekjønna par skal kunna gifta seg i kyrkja si.
Open folkekyrkje ynskjer ei kyrkje som alle skal kunna leva heile livet i, der alle skal kjenna seg velkomne, sedde og stadfesta. Kyrkja har ikkje A- og B-medlemer – dåpen er einaste medlemsvilkår.
Open folkekyrkje vil at kyrkja skal utviklast vidare som ei open, inkluderande og demokratisk folkekyrkje. Vi vil arbeida for at folk meir og meir skal kjenna at dei høyrer til i kyrkja, slik at den kristne trua vert halden levande og er viktig i  den einskilde sitt liv. Kyrkja skal vera open for alle, fremja menneskeverdet og motarbeida diskriminering.

Du har stemmerett i soknet ditt. Finn ditt sokn i lista nedanfor: