Denne helga markerer Den norske kyrkja allehelgen. Søndag 3. november er allehelgenssøndag, også kalla helgemesse.
Gjennom ulike minnemarkeringar samlar menneske seg i takk til Gud for livet som har vore, og er saman i sorg og sakn.
Ventar hundre tusen innom kyrkja
Den norske kyrkja reknar med at over hundre tusen vil vere innom kyrkja dei komande dagane.
Årleg er det over 1 200 minnegudstenester på allehelgenssøndag, som kvart år samlar meir enn 85 000 deltakarar. I tillegg vil kyrkja vere open mange stader for å vere stille eller tenne lys inne i kyrkja – og denne helga er det også ei tid for konsertar. Ei oversikt over arrangement finst på skjerikyrkja.no.
Gravplassane vert ofte vakre lyshav denne helga. Mange besøker gravene for å tenne lys. Gravplassen er ein viktig stad for mange, i 2023 viste kyrkja si medlemsundersøking av 60 % var innom gravplassen i løpet av året.
Kyrkjetilsette på torg og kjøpesenter
– Fleire stader er medarbeidarar ute på kjøpesenter, torg og gravplassar for å dele ut lys, slik at folk kan gå og tenne eit lys på grava til minne om ein død.
Det seier leiar i Kyrkjerådet, Harald Hegstad, og held fram:
– Denne helga samlar mange seg i kyrkjene for å vere saman i takksemd og sakn etter våre kjære, men også med bønn om Guds hjelp i sorga.
Minnemarkeringar for dei døde er blant dei eldste kristne skikkane. Først for dei kristne martyrane som vart drepne for si kristne tru – men seinare kom ønsket om ein minnedag for alle døde.