Mij la vuostasj viehkke surggobále?
Ij aktak ulmusj galga dárbahit aktu surggat. Dan diehti la Vuona girkko ájádusájt ja oajvvadusájt tjoahkkim ma midjij guojmmeulmutjijda álkkebun dahki gávnnut doarjjon sunji guhti surggá. Surgov ij máhte divvot, valla gå dav juogat de buorebut dav gierddá. Girkko la guhkijt juo surgulattjajt huksam ja doarjjum. Oajvvadusá dánna li ájgodum vuostasj viehkken, vuostasj ájge, gå jábmem duosstu.
Gájkka surgo li sierralágátja ja duohtavuoda jalik bagádusá e gávnnu. Vájbi danen aj nåv ålos jiebbi ietjá ulmutjij surgguj oassálasstet. Dáj oajvvadusáj Vuona girkko doajvvu ålobu dåbdduji jaskadabbon ja li ienep gárvvása, vaj aktak ij aktu surgguj bátse.
Válde aktijvuodav
Ij galga surgulattja duogen aktijvuodav válldet. Ep muojon lulu javllat ”skuolkasta munji jus la juoga, mån lav dánna” dan diehti gå surgulasj vájbi ij nagá årrot sån gut ietjas gullen dahká. De buorep la jus javllap ”Skuolkastav dunji dijstagá vaden, vássteda jus nagá”. Muhttijn ij vássteda ja årrus de nåvti, surgulasj ij agev nagá vásstedit, valla máhttep de vaden ja vaden skuolkkat.
Álgada
Oajvvada ållu dábálasj dåjmav. Gåhtjo káffaj, gæhttje filmav jali nåvkå váttsatjihtte. Ålos gudi li surggamin åhtsåli bårkatjav ja ieme viessomav surgo sinna. Usjudalá sån gev bivddi ihkap vuornnu boahtemis ja dat la dåhkkidahtte, ájnnasamos la mij gatjádip – ja jut vat duosstap gatjádit.
Boarkki sjávodisvuodav
Muhtema dåbddi låssåt la guládit guojmmeulmutjij gut surggá. Majt javlav? Na jus ber sjávvun jali tjierrogoahtá? Valla ájnnasamos ij la mejt javllap ájnat jut sjávodisvuodav boarkkip. Ja muhttijn la sms:a buorep tjoavdos telefåvnås dajna gå álkkebut tjállá ja vásstet.
Vuoseda lahkavuodav
Ålos mijás balli ilá lahka nággit ja álu hæjttá dan láhkáj vaj ep åvvå guláda. Soajttá nåvti ussjolip surgulasj dárbaj ráfev jali vuorddep gullumis vehik desik ”værámus la vássám”. Ájnas la mij tjielggasit vuosedip mij danna gávnnup vaj surgulasj ij ietjas dåbdå ålggolin jali ebdalussjen.
Vatte sajev
Soajttá moaddása avta bále soarjjiji sæmmi ulmutja badjel. Ulmutja gudi li lagámusáv láhppám li ietjasa sierra láhkáj tjanádum dan ulmutjij gut dálla la gáhtum. Surggo ij la sæmmi lágásj ulmutjis ulmutjij. Ájnas la mij adnep surgulattjav guovddelin vaj ep iehtjama mujtoj ja dåbdoj suv duoppeda. Hæhttup mujttet surgulattja dåbdojt vuostatjin biedjat, makkára ájn li. Mijá ájádusá ja giehto li diedon aj ájnnasa – valla ælla ájnnasabmusa.
Liege gierddis
Juohkka surgulattjan la ietjas surggo, mav mij vierttip dádjadit ja gierddat. Máhttá sjaddat nåvti vaj mij gæhttjalip surgov ierijt jaskadahttet jali vájbbap gå ij suono. Surgon ij la "buoremusåvddålabiejvve" ja ij gávnnu vissa ájgge surggat. Muhtem ájádusájt dárbaj gærddodit, soabmásijda soajttá liehket ájnas oasse surgov dádjadimes ja bargadimes.
Ale surgov vajálduhte
Máhtá rijmmuj tjálestit goassa gålmmå, guhtta jali lågenanguokta máno li vássám dallutjis gå ulmusj jámij. De máhtá vas aktijvuodav válldet dalloj. Gå værált birra manná åvddån de la álkke jáhkket surggo binnu, valla moaddásijda la jur nuppe guovlluj. Surggo ihkap værrán. Sierraláhkáj gå vuojnnet ij aktak ietján vuojnnet mujte jali berusta des. Surggo la vájvve, valla jus surgo noadev juohká de soajttá gæhppu.
Mujte jahkebiejvev
Sierralágásj mujttobiejve ja ávvudallama li álu låssåda, vájku jage li gållåm. Guojmmeulmutjin máhtá surgulattjav doarjjot gå vuoseda surgov juogada ja ájn mujtá suv gut la jábmám. Dá mujttobiejve máhtti liehket jábmembiejvve, riegádimbiejvve jali nágin ietjá sierralágásj biejvve mav mujttá. Iesj sjurra dán biejve máhttá liehket stuoráp jali unnep, mij la ájnas la surgulasj ij dárbaha aktu soarjjit.
Joarkket mujttet
Ale balá ságastimes dan ulmutja birra guhti la jábmám. Gæhttjit gåvåjt ja juogadit mujtojt gaskanihtte. Dáv galggá sierraláhkáj mujttet gå surgulasj la mánná, danen gå de mij ållessjattuga lip ájn ienep várrogisá ja ballap ilá lahka boahtemis låsså dåbdojda.
Viehkke árggabiejven
Gávnnuji moadda praktihkalasj dago majt máhtá surgulattja åvdås dahkat, ássje ma soajttá mierkkiji ienep gå bágo. Muhttijn berustit soajttá merkaj mánájt gæhttjat, málestit, plenav biesskedit, oasestit jali goadev bassat. Návti máhtá berustit konkrehta dagoj baktu.
Mujttobájkev guossidit
Gávnnu gus sierralágásj bájkke mij máhttá tjanáduvvat sunji gut la ierit vuolggám? Máhtá dåhku vuolgget surgulattja siegen ja aktan mujttet. Hávden ginntalav tsahkkidit, spellat musihkav majt sån buoremusát lijkkuj, lávgudallat kájas mij merkahij ednagav sunji, jali bårråmsadjáj mannat ja diŋŋgut dav biebmov majt sån buoremusát lijkkuj gut la gáhtum. Gávnnuji moadda vuoge gåktu ulmutjav mujttalit.
Frykt ikke, for jeg er med deg, vær ikke redd, for jeg er din Gud! Jeg gjør deg sterk og hjelper deg og holder deg oppe med min rettferds høyre hånd. (Jes 41:10)
Svenska kyrkan la brosjyjrav dahkam ja julevsámegiellaj jårggålam. Vuona girkko la jårggålimev hiebadam. Stina Löfgren la tjuorggam.