Nuorra Sámi girkoráđđi galgá jođihit sámi girkoeallima

Historjjálaš nuorra Sámi girkoráđđi gávnnada vuosttaš, vuođđudeaddji čoahkkimii Tromssas miessemánu 30.-31. b. – Mun sávan ahte mii šaddat ráđđin mii geahččá ovddos guvlui ja dahká buriid mearrádusaid sámi girkoeallimii, dadjá ođđa jođiheaddji Sara Ellen Anne Eira (40).

Easkka válljejuvvon ráđis lea gaskamearálaš ahki 43 jagi, das lea buorre ahkejuohku, ja 2 lahtu leat vuollel 30 jagi. Eira, gii ieš háliida áŋgiruššat ahte mánát ja nuorat ožžot lunddolaš gullevašvuođa girkui, jáhkká ahte ráđis leat ollu vejolašvuođat dahkat buori barggu. – Muhto mii leat ođđasat dán bargui ja dárbbašit áiggi oahpásmuvvat áššesurggiide maiguin mii galgat bargat, dadjá son.

Sámi girkoeallin ođđa girkoortnegis

Ođđa ráđđi lea válljejuvvon áigodahkii  2016-2020. Dát leat jagit go formálalaš čatnasat girku ja stáhta gaskkas heaittihuvvojit, ja girku galgá ieš mearridit boahtteáiggi organiserema. – Hui deaŧalaš bargun midjiide gártá váikkuhit ahte Norgga girku váfista buriid rámmaeavttuid sámi girkoeallimii boahtteáigái. Mii áigut geavahit áiggi oahpásmuvvat dáidda proseassaide min vuosttaš čoahkkimis vai mii leat ráhkkanan go áššit bohtet min beavdái čavčča rájes, dadjá ovdaolmmoš Sara Ellen Anne Eira.

Ráđđi galgá muđui meannudit ee. dáid áššiid: gulahallanevttohus Sámi girkolaš válgačoahkkimii, girkolaš seminára Tråante 2017 ávvudeamis, almmuhit prošeaktaruđaid sálbmalávlumii, ja evttohit sápmelaš várrelahttu Norgga girku sáttagoddái Lutherlaš máilmmelihttu váldočoahkkimii 2017.

 

 

 

Kontaktinformasjon for Sámi girkoráđđi - Sáme girkoráde - Saemien gærhkoeraerie - Samisk kirkeråd

Besøksadresse:

Stakkevollveien 41

9010 Tromsø

 

 

 

 

 

Samisk kirkeråd

Postboks 799 Sentrum

0106 Oslo

E-post: post.kirkeradet@kirken.no