I Ytre Arna har me for tida ikkje nokon eigen aktivitet eller gruppe særskilt for ungdom 15. år og oppover. Men du kan delta som hjelpeleiar i konfirmantarbeidet eller på trusopplæringstiltak som t.d. Lys Vaken. Du kan òg vera med og leia sundagsskulen, helst saman med ein erfaren leiar den første tida. Viss ei gruppe er interesserte i det, kan me laga til eit leiartreningskurs. Det kan òg vera aktuelt å senda nokon på kurs i andre kyrkjelydar.
Elles er du velkomen til å delta i gudstenestene. Her kan du òg om du vil, få oppgåver som kyrkjevert, tekstlesar osv. Kanskje har du idear sjølv?
Og viss de er ei nokre ungdomar som finn ut at de saman ønskjer å starta opp ei eiga ungdomsgruppe/ungdomsklubb, eller kanskje eigne ungdomsgudstenester, så vil kyrkjelyden gjera det me kan for å støtta og leggja til rette for det.
Anten du tenkjer å delta på den eine eller andre måten, er det berre å ta kontakt med Ingvar (presten) eller Marianne (trusopplærar) eller nokon andre av konfirmantleiarane viss det er enklare.
Det er viktig at alle som høyrer til i kyrkjelyden, er med på å gje innspel til korleis arbeidet skal drivast. Du kan vera med på å bidra med dette når du er med i fellesskapet. Når du fyller femten år, er du religiøst myndig. Då kan du blant anna bruka den kyrkjelege stemmeretten din ved kyrkjeval. Dette er éin av måtene du kan påverka det som skjer i kyrkja.