Cash-messe i Meland kyrkje søndag 10.mars kl.19.00

Håp og trøyst

Andreas Sagstad Berg er ein av initiativtakarane og har eit nært forhold til «mannen i svart». Til trass for sin relativt unge alder, har han spelt og sunge Cash i mange år.

– Johnny Cash var opptatt av å gje menneske håp og trøyst i vanskelege situasjonar. Han var av dei første som hadde konsertar og spelte inn plate i fengsel: «At Folsom Prison». Det viser at han brydde seg om dei svake, seier Sagstad Berg. Til gudstenesta er det vald ut låtar som formidlar nettopp håp og trøyst. Dette vil visa andre sider av artisten enn dei som kanskje er kjent for mange og mest tydelege i til dømes filmen «Walk the Line».

På heimebane

– Cash kom sjølv frå stusselege kår og hadde eit liv fylt av både oppturar og nedturar. Han sleit med mange ting, men fekk sjølv oppleva nåden. Han var så ekte, ærleg og audmjuk i formidlinga si gjennom musikken, seier Sagstad Berg som gler seg stort til å vera med på å synga ein av favorit-artistane, no i kyrkja han sjølv høyrer til i. Både faste kyrkjegjengarar, Cash-fans og andre interesserte vert ønska velkommen.

 
Meland-koret Felix Vocalis vil også denne gongen bidra med ei gruppe koristar. Knarvik-prest Torbjørn Sæle, som sjølv er vaksen opp i Meland, leier gudstenesta og nattverdfeiringa. Han vil preika over bibeltekstar som Cash tonesette. Etter kveldsgudstenesta vert det servert ein enkel kyrkjekaffi. Cash-messa vert arrangert av Meland kyrkjelyd.