IEU har hovudkyrkja og tre bydelskyrkjer i Santiago de Cuba, ein by med om lag 400.000 innbyggarar. IEU har òg kyrkjer i byen Guantánamo og landsbyen Achotal. I 2022 starta dei opp ein ny kyrkjelyd i bydelen Marianao i hovudstaden Havanna.
Representantar frå bispedømet vitja venskapskyrkja på Cuba i mai 2022 saman med Normisjon sin landansvarlege for Cuba. Inntrykka frå turen gjorde at vi før jul i 2022 byrja samle inn brukte klede, sko, syklar og anna for å sende til Cuba. Saman med matvarer og hygieneartiklar for om lag 200.000 kroner gjekk containeren av gårde med båt frå Bergen 3. april 2023.
I samband med innsetjing av ny biskop i Bjørgvin 16.april 2023 hadde vi seks kubanske gjestar som representerte kyrkjelydane i Guantánamo, Santiago og Havanna.
For at fleire skal verte kjende med venskapskyrkja på Cuba planlegg vi ein «kyrkjelydstur» i januar 2024.
Bispedømet oppmodar alle kyrkjelydane om å gje minst eitt årleg kyrkjeoffer til Cuba-prosjektet, og gjerne ha ein temasøndag om Cuba.
Pengane som blir samla inn går til å støtte løner til pastorar og diakonar på Cuba og det som skjer i og gjennom kyrkja der. Det har òg gått til containeren med hjelpesending.
På artiklar og oppdateringar på heimesida og Facebook-sida vår kan du lese meir om alt dette, få glimt av kva som skjer no, finne ressursar for å arrangere temasøndag om Cuba og sjå korleis støtte prosjektet. Om du har spørsmål eller innspel kan du kontakte vår «Cuba-koordinator» Kjell Ove Hatlem på mail eller telefon.