Medlemsundersøkinga for Møre bispedømme
Vel halvparten av medlemmene i kyrkja i Møre seier at dei anten trur fast på Gud og ber til Gud, eller trur av og til. Veit-ikkje-gruppa aukar noko.
Trass i pandemien viser årets medlemsundersøking at 73% av medlemane i Møre har oppsøkt ei kyrkje (fysisk eller digitalt) i 2021, ein nedgang på 10% frå 2020. Nedgangen er særleg på gudstenester på julaftan, gudsteneste med dåp, konsert- og kulturarrangement i kyrkja og kyrkjeleg gravferd. Dette er i stor grad som venta, sidan perioden denne undersøkinga dekkjer inkluderer jula 2020, då det var strenge grenser for tal deltakarar ved arrangement i kyrkja.
Undersøkinga for Møre viser framleis høg oppslutning generelt om kyrkjelege handlingar og seremoniar:
Rundt 80% av kyrkjemedlemene i Møre ville valt barnedåp dersom dei fekk born no. 80 % ønskjer seg kyrkjeleg gravferd. Rundt 70% av medlemmane ville valt kyrkjeleg konfirmasjon og 64% å gifte seg i kyrkja.
Desse tala held seg stabile samanlikna med dei føregåande åra.
57 % av kyrkjemedlemmane i Møre meiner at det lokale kyrkjebygget betyr mykje for dei. 72% seier at det er viktig for dei at kommunen held kyrkjebygget ved like.
Tala frå Møre viser at fleire medlemmar har sett informasjon frå kyrkja i lokalavisa enn dei som har mottatt kyrkjelydsbladet. Dette er unikt på landsplan. Den rike floraen av lokalaviser i Møre synest å fange opp og presentere mykje kyrkjeleg stoff.
Undersøkinga viser også at 73 % av medlemmane i Møre først ville søkt på nett (googla eller sett på kyrkjelyden si nettside) dersom det var noko dei lurte på om kyrkja. Berre kring 10% ville ringe eller besøke det lokale kyrkjekontoret. Ein av tre er positiv til å få tilsendt informasjon om kyrkjeleg aktivitet og arrangement. 1 av 2 har sett innhald fra Den norske kyrkja på sosiale medium.
Nær 60% av kyrkjemedlemmene i Møre er stort sett samde med kyrkja når den uttalar seg. Dette er mellom dei høgste resultata i landet.
Medlemsundersøkinga for Møre bispedømme