Ukrainas lea ain soahti. Gaskanuortariikkain lea dáhpáhuvvan terror ja lea surgadis soahti dán čavčča. Olu olbmot leat duššan. Olu olbmot leat massán sin ráhkkásiid. Eallima deavdá moraš ja doaivvuhisvuohta.
Ii das vel nohka. Dálkerievdamat lea ollen deike: dálki rievddada sakka dávjjit go ovdal. Dávja leat heajos dálkkit, min guovlluin ja muđuige máilmmis. Garradálki Hans ii čuohcan nu sakka midjiide, muhto mii oinniimet muhtin oasi dan váikkuhusain. Olu olbmot vásihit váttis ruhtadili. Ja nu mo juo láve: sii geain juo lea váttis dilli, sidjiide čuohcá dát eanemus.
Profehta Jesaja dajai, birrasii 700 jagi ovdal Jesusa riegádeami; gearddi dáhpáhuvvá ahte nuorra nieida riegádahttá bártni ja bidjá sutnje namman «Immanuel» (Jes 7,14). Immanuel lea hebreagiella, ja dat máksá «Ipmil minguin». Evangelista Matteus čállá ahte eŋgel almmustahtii dán sága Josefii, ja attii dihtosii ahte mánná mii lea Maria siste, lea sahkanan Bassi Vuoiŋŋas. «Son riegádahttá bártni, ja don galggat bidjat bárdnái namman Jesus, dasgo son beastá iežas álbmoga sin suttuin.» celkkii eŋgel (Matt 1,21).
Ipmilvuođa lagasvuohta bahás ja váttis máilmmis. Su namma guhte riegáda, lea nappo Immauel, mii máksá Ipmil minguin, ja Jesus mii máksá beasti.
Mii dárbbašit álo áiggis gullat sága Ipmila lagasvuođa ja bestojumi birra. Go eallin šaddá erenoamáš váttisin olu olbmuide, de lassána dát dárbu ain eambbo.
Mii dárbbašit juoidá mii lea bistevaš ja stáđis, masa mii dollet go máilmmis lea oadjebasmeahttun dilli. Mii dárbbašit doaivvu go ollugat masset doaivvu. Mii ávvudit juovllaid alimus skábman. Lea álkit oaidnit čuovgga go lea seavdnjat min birra. Ja mii dárbbašit čuovgga.
Mun udnon buohkaide geat lohket dán boahtit girkui ja ávvudit juovllaid doppe. Gullat juovlaevangeliuma. Lávlut buriid ja oahpes juovlasálmmaid, ja buot eanemus: rohkadallat Ipmilii váttis áiggis. Sii guđet eai olle girkui boahtit, sáhttet áinnas čuovvut ipmilbálvalusa radios ja TV:s.
Vuoi boađe, rahpat dáhtu mu sillon, váibmon dál!
Mu šuohkáhusaid gula; O Jesus, boađášit!
Ii dat leat amas sadji, don ieš dan oastán leat,
vai mun du oskkáldasat mu váibmui oamastan,
(Sálbmagirji II nr 371, v. 7)
Sávan buohkaide buori juovlaáiggi!
Olav Øygard
bisma