Visitasen byrja med at biskopen møtte stab og råd. Dei fortel om god kontakt med befolkninga, der mange er positive til kyrkja. Det er høge tal på dåp, konfirmasjon, vigsler og gravferd. Samstundes ser ein at tala for oppslutnaden om gudstenesta framleis ikkje er på nivå med før pandemien. Mange deltek i kvardagskyrkja, på tiltak i trusopplæringa, konsertar og diakonalt arbeid. Gravferdstenesta når bredt ut og er til trøyst for mange.
Kyrkjelyden er med å arrangera store arrangement, som «Barn er Bra»-festivalen og «Camp Ryfylke» for konfirmantane. Samstundes står kyrkjelyden støtt og trufast i det daglege arbeidet. Eit godt døme på dette var møtet med barna i aktivitetsklubben «Lyspunkt» i Saudasjøen kapell tysdag ettermiddag. Barna viste fram dei fine og fargerike tinga dei hadde laga på samlingane, og etterpå fekk dei stille spørsmål til biskopen.
Biskopen møtte aktivitetsklubben «Lyspunkt».
Samvirke mellom kyrkja og kommunen
Onsdag formiddag var det møte med formannskap og kommunestyre i det flotte og nyrenoverte kommunehuset. Landets yngste ordførar, Håvard Handeland, innleia møtet med ein presentasjon av Sauda kommune. Kyrkjelyden fekk og presentera sitt arbeid som ein viktig samfunnsaktør og medspelar til kommunen. Kommunedirektøren inviterte kyrkjelyden til kvartalsvise møter, der ein samtalar om framdrift om dei oppgåvene kommunen skal bidra til å løyse. Møtet med formannskapet blei avslutta med samstemt «No livnar det i lundar», etter oppfordring frå biskopen om å fremje fellesskapsangen i kommunen.
Biskop Anne Lise på talarstolen i kommunehuset.
Den viktige kulturarven
Onsdag føremiddag var det møte med leiinga i skular og barnehagar. Det var ein god samtale om samarbeidet, som alle er nøgde med. I eit livssynsope samfunn er det viktig at barnehagebarn og elevar blir trygge på eige livssyn for å kunna møta og forstå andre. Her kan kyrkja som forvaltar av kultur og tradisjon vera ein viktig medspelar.
Torsdag formiddag var det pilegrimsvandring med elevane i 7. trinn ved skulane Risvoll og Austarheim. Langs vegen frå Sauda kyrkje til Kastfoss var dei innom mange spennande stasjonar, der dei fekk lære om kyrkja, pilegrimar og kristenretten. Om kvelden var det framføring av førestillinga «Kunsten å sjå» om den lokale kunstmålaren Samuel Tveit i Folkets Hus.
Sjuendeklassingane framme i Sauda kyrkje.
Musikalsk diakoni
Torsdag ettermiddag var det besøk på institusjonene Høllandstunet og Åbøtunet. Her hadde biskopen ei enkel liturgi med salmer, bibeltekst, bøn og velsigning. Organisten heldt ein minikonsert med kjende songar, og det blei ei fin stund med musikalsk diakoni og gode samtalar.
Eit grønare smelteverk
Torsdag besøkte biskopen Eramet Norway Sauda, ein stor og viktig hjørnesteinsbedrift i kommunen. I over 100 år har smelteverket vore ein sentral del av Sauda, og hatt ei stor historisk og økonomisk betydning for byen og lokalsamfunnet.
På fabrikken var det ei spanande omvising ved direktøren og ein tillitsvald. Smelteverket er no inne i ei omstilling der produksjonen skal verta grønare og klimanøytral på sikt. Det er viktig og avgjerande for vidare drift. Det er framleis gode forbindelsar mellom fabrikken og kyrkja. Kanskje kan smelteverket forsyne kyrkja med vannboren varme i åra framover?
Omvisning på smelteverket Eramet Norway Sauda.
Tru gir tryggheit
Kyrkjelyden sin visjon er: «Hjelpa alle til den kristne tru. Tru gir tryggheit!» Dette syner ei kyrkje som vil vera til stades i folk sine liv og formidla tru på ein måte som kjennest relevant og livsnær. Kyrkjelyden er oppteken av folk og kyrkje, kjærleik til staden, tradisjon og kyrkjebygg. Sauda har Folkets hus – og folkets kyrkje!
Rådgjevar Ragnhild Halle, biskop Anne Lise Ådnøy, sokneprest Espen Gya og prost Sigrid Sigmundstad i Hellandsbygd kapell.