Dersom du ønskjer dåp i ei gudsteneste, bestiller du via skjema på nettet. Der finn du oversikt over ledige datoar.
Dersom du heller ønsker ei enkel, uformell ramme rundt dåpen, avtaler du direkte med presten. E-post sokneprest Kristin Hjertaker: kh937@kirken.no
Å høyra til
Arna kyrkje betyr mykje for mange; å vera døypt og konfirmert her, koma tilbake ved dei store anledningane i familien, å høyra til.
Dåp er inngangen til å høyra til i Arna kyrkjelyd, Den norske kyrkja – og heile den verdsvide kyrkja. Dåpen er eit mysterium, me kan ikkje heilt forklara kva som skjer. Men me trur at Gud handlar i dåpen og at den som blir døypt, uansett alder, får del i Guds rike og vert kopla på Jesus Kristus, som er Guds son og vår bror.
Dåpen er ei gåve
Dåpen er eit teikn; det er ei hending, noko som skjer der og då – og som samtidig peiker utover seg sjølv. I dåpen får me del i frelsa, uansett om me er små babyar når det skjer, store barn, ungdomar, vaksne eller eldre. Og uansett om me føler noko spesielt eller ikkje. Dåpen handlar om å ta imot Guds gode gåver; det er gratis og uavhengig av våre prestasjonar. Det er Gud som handlar i dåpen.
Når me ser eit lite barn blir bore fram, blir me minna om dette: Ingen kan bera seg sjølv. Gud tar imot oss i kjærleik og nåde, anten me er store eller små.
Aldri for seint
I Arna - og andre stader - er det ein del menneske som av ulike grunnar ikkje vart døypte som barn, og som heller ikkje har blitt døypt som vaksne. Somme kjenner seg likevel heime i kyrkja, men er ikkje medlemmer. For det vart aldri slik.
Ta kontakt med ein av prestane eller kyrkjekontoret om du ønskjer samtale om dåp; anten for å avklara om du eigentleg ønskjer dette – eller for å avtala tid. Me legg til rette for den enkelte så langt me får det til.
Rom for deg i kyrkja
For vaksne eller eldre kan det kanskje kjennast litt for stort å verta døypt i ei vanleg gudsteneste søndag klokka 11. Det er sjølvsagt mogleg! Men det er også fullt mogleg å avtala dåp i ei eiga dåpsgudsteneste berre for næraste familie, eller dei du ønskjer skal vera til stades. Det kan like gjerne skje på ein ettermiddag midt i veka.
Vit at du uansett er velkomen til kyrkja, i sorg og glede, kvardag og fest. I kyrkja er det rom for deg!