Denne hendinga er avgjerande for dateringa av Høre stavkyrkje, for ei runeinnskrift i kyrkja blir tyda slik; «Brørne Elling og Audun hogg (tømmer) til denne kyrkja det året Erling fall i Nidaros». Ca 1187 var det storbryllaup i Høre. Då vart Bård Guttormson på Rein vigd til Ragnhild, dotter til Elling på Kvie, og stavkyrkja stod nok ferdig til dette bryllaupet.
Hertug Skule Bårdsson (son til Bård og Ragnhild) voks opp på Kvie. Han styrte landet i fleire år for den mindreårige kongen Håkon Håkonsson (konge frå 1217 til 1263)
I 1979 var det utgravingar under Høre stavkyrkje. Ein fann då til saman 365 myntar og 1408 andre gjenstandar. Desse funna visar at ei datering av kyrkja til ca. 1180 er riktig, og at Høre stavkyrkje måtte ha ein sentral posisjon i middelalderen. Kyrkja vart ombygd til sin noverande form i 1823.
Ved Høre stavkyrkje ligg Vang kommune sin 1000-årsstad, med eit relieff av Gyda på Kvie og riddar Sigvat på Lerhol.
Stavkyrkja er i dagleg bruk til gudtenester og andre kyrkjelege handlingar, og har omvising om sommaren.