Hareid kyrkje blir ope denne helga i etterkant av minnegudstenesta laurdag og i etterkant av helgemesse søndag, slik at ein kan gå inn i ei varm kyrkje for lystenning, stille, bøn, sakn, håp, alle følelsar som vi måtte ha – eller samtale om ein ønskjer det. Diakoniutvalet er tilstades i kyrkja.
Temakveld 5/11 kl. 18.00, kyrkjelydshuset:
Fredag kveld kl 18 inviterer Diakoniutvalet til temakveld med diakon Sigmund Ruud, «Når livet brister, finnes det en kjærlig Gud?». Det blir ei innleiing og muligheit for samtale kring kaffikoppen. Gratis, ope for alle.
Nattkafe for ungdom 5/11 kl. 20.00-23.00, kyrkjelydshuset:
Etter temakvelden, blir det Nattkafe på kyrkjelydshuset, frå ungdomsskulealder og oppover. Gratis pizza sponsa av Sparebanken Møre, og sal frå kiosk og vi kan tenne lys. Aktivitetar som bordtennis, airhockey, fotballspel, brettspel, musikk og quiz.
Ta med venane dine og kom!
Minnegudsteneste 6/11 kl. 16.00, kyrkja:
Laurdag ettermiddag kl. 16.00 inviterer vi til gudsteneste i kyrkja, særskilt for dei som har mist familiemedlem siste året. Medvirkande er Vibeke Holstad, Halvard Grimstad, Lidvar Grimstad og Lars Hartig-Tangedal. Enkel kyrkjekaffi. Mange besøkjer gravene og tenner lys i denne tida, difor er kyrkja ope utover kvelden til kl 18.30, slik at ein kan gå inn i ei varm kyrkje for stille eller tenne lys.
Helgemesse 7/11 kl. 11.00, kyrkja:
Søndag 7. november inviterer vi som vanleg til gudsteneste i kyrkja. Medverkande er Hareid blandakor, Ida Teige og Lars Hartig-Tangedal. Kyrkja vert opa for stille og lystenning ut over ettermiddagen til kl 16.00.
Stille konsert 7/11 kl. 19.00, kyrkja:
Som avslutning på Allehelgensveka blir det «Stille konsert» med Hjørungavåg Brass søndag kveld. Ein lun og stemningsfull konsert som ein kan varme seg på. Gratis og ope for alle.