Både grupper frå barnehagane, barneskulane og ungdomsskulen har fått tatt del på julegudstenester, og for alle dei som ikkje kunne kome blei det streama til skulane. Både konsertar og endåtil drop-in-dåp der 5 ville døype seg, har blitt tilrettelagt. Barn i kvitkledde kapper gjekk Luciatog på kyrkjebakken, med juletonar frå musikklag og korps ein søndag ettermiddag. Folk sett pris på, og vi treng å kunne møtast og høyre til noko større, saman med andre.
Mange har og vore samla i kyrkja og tatt farvel med sine kjære som dei har mista. Vi har gudstenester både i kyrkja og for bebuarane på Hadartun. Folkekyrkja betyr mykje for mange i Hareid og dørene er opne for håp, trøst og tru. Alt handlar om relasjonar, om møte med folk, kvarandre sine liv og kvardagar. Vi kan vere der for kvarandre og bry oss.
Lyset blir sterkare!
Adventstida har blitt markert med å tenne eit nytt lys på kvar av dei fire søndagane fram mot jul, ein gamal og fin skikk. Lysa tiltar i styrke dess mørkare det blir ute og dess nærmare vi kjem det store lyset: Jesus som blei født i ein stall. Lyset skin i mørket, og mørket har ikkje overvunne det, står det i Johannes 1,5. Året 2021 har vore eit mørkt år for mange, men lyset vil overvinne mørket. Alltid.
I jula tenner vi lys for alle vi er glade i , for alle vi har mista, for alle som kjenner seg einsam, og for Jesus som kom til jorda.
Med Edvard Hoem si gjendikting av «O, helga natt» til nynorsk, ønskjer vi alle ei fredfull og velsigna jul!
Å, SIGNA NATT
Å, signa natt,
Å, helga stund for verda,
den gong Guds son til jorda steig ned.
Han som har sona alle våre synder
og måtte døy for å gi oss fred.
Og håpet skin igjennom verdsens mørker,
og lyset fell ut over land og hav.
Folk, fall på kne,
og hyll den nye fridom.
Å, signa natt,
du frelse til oss gav.
Han kom hit for å rive alle stengsler.
Han opnar himmelen,
på jorda han trør.
Han er her og stiller våre lengsler,
og kjærleik bind dei som var fangar før.
I krybba låg han,
kongen over kongar.
I armod kom han til våre mørke verd.
Folk, fall på kne.
Og lovsyng denne fridom.
Å, signa natt,
vår gud er komen nær.
Å, signa natt,
vår Gud er komen nær.
Edvard Hoem