21.august var første arbeidsdag for Elin Gaustad i stillinga blant born og unge i Hareid.
Ho vil få hovudansvar for Ten-Sing koret og Tweensklubben, men har heldigivs med seg gode medarbeidarar til dette.
Styret i Ten-Sing har hatt sitt første styremøte saman med den nye arbeidaren og lagt planen for hausten. Første øving vert tirsdag 29.august. Då er det planlagt å starte med litt sosialt; presentasjon av styret og dirigent, blikjent leikar og litt øving på slutten.
Torsdag neste veke er første samling for Tweensklubben på Hareid bedehus. Nokre av dei som var med der i vår har Elin alt møtt då ho var med juniorkonfirmantane til Alskleiva.
I tillegg til desse faste oppgåvene vil Elin ta del i nokre av tiltaka i trusopplæringa og kanskje kan det kome noko nytt og spanande aktivitetar etterkvart?!
Elin Gaustad er 29 år, kjem frå Vedvang i Eide kommune. Ho har sunge i kor sidan ho var lita jente og halde på med musikk på mange ulike nivå.
Nokre vil kanskje kjenne igjen namnet frå X-factor? Og det stemmer! Ho deltok nemleg der i 2009 og konsekvensen av det var platekontrakt med Jan Fredrik Karlsen. Ho har også vore på norgesturne med Kurt Nilsen.
For tida bor ho i Volda der ho studerer Engelsk. Frå før har ho studert musikk og religion ved høgskulen i Volda.
Vi er glade for ein ny medarbeidar i flokken og ynskjer lukke til med oppgåvene!