Tysdag denne veka var preses og biskop i Nidaros domprosti Olav Fykse Tveit på besøk i Trondheim fengsel og forvaringsanstalt, saman med domprost Kristin Moen Saxegaard.
Saman møtte dei leiinga i fengselet, og fekk orientering om fengselet og kriminalomsorga.
– Det var svært interessant å høyre frå dei tilsette i kriminalomsorga korleis dei arbeider og utfører sitt viktige samfunnsoppdrag, korleis dei møter utfordringane i kriminalomsorga, og kva dei tenkjer om dette feltet framover, seier Fykse Tveit.
Delegasjonen frå Den norske kyrkja fekk også omvising på dei ulike avdelingane – og mellom anna fekk dei sett på verkstadane og dei andre roma der dei innsette er i aktivitet gjennom veka.
Tilsynsansvar for fengselspresten
Som biskop i Nidaros domprosti har Fykse Tveit også tilsynsansvar med fengselspresten, og fengselsvisitasen i Trondheim vart avslutta med ein samtale mellom prest og biskop.
Det er rundt 20 prestar som jobbar fulltid i fengsel, i tillegg til ei rekke andre som jobbar i kyrkjelyd men er fengselsprest som ein mindre del av si stilling. Dessutan har Frelsesarmeen ei full stilling ved dette fengselet.
Ei viktig, men lite synleg oppgåve
Preses meiner prestar i institusjonar har ei viktig oppgåve i Det norske samfunnet, sjølv om dei kanskje ikkje er så synlege:
– Våre fengselsprestar har ei viktig rolle i kriminalomsorga, i å møte folk, lytte til dei gjennom samtalar, og å tilby gudsteneste og andre aktivitetar. Som ei folkekyrkje for alle er vi til stades i ulike institusjonar med våre dyktige medarbeidarar og med vårt bodskap om tru, von og kjærleik.
Delegasjonen på besøk i Trondheim fengsel: Fengselsprest Geir-Øyvind Bandlien, seniorrådgjevar i Bispemøtets sekretariat Helge Kollerøs Nylenna, domprost Kristin Moen Saxegaard, preses Olav Fykse Tveit og fengselsleiar Egil Gabrielsen.