– Eg søkte jobben fordi det var mange forskjellige oppgåver som skulle gjerast, mykje variasjon. Det ville gje meg fleire erfaringar.
Det seier Ida Bilstad, som er ein av dei unge som har sommarjobb i kyrkja på Randaberg utanfor Stavanger i år.
Rydding og svelelaging
På arbeidslista for ungdommane i Randabergkyrkjene står mellom anna hagearbeid, rydding, vere med på arrangement, lage kaffimat, snakke med folk og servere lappar.
– Eg søkte jobben for å få gode erfaringar vidare i livet, seier Maja Vasshus, som set pris på breidda av oppgåvene i sommarjobben:
– Det er gøy med mange ulike oppgåver!
Godt miljø
Maja og Ida er blant fleire unge som har sommarjobb i Den norske kyrkja denne sommaren. Kyrkjerådet lyste tidlegare ut midlar til lokalkyrkja med dette formålet.
Maja søkte jobb etter å ha vore konfirmant i år.
– Eg var konfirmant i år. Det er eit godt miljø i kyrkja, og eg likar å vere der. Eg møter mange forskjellige folk der, seier ho.
Ho synest det kjekkaste til no har vore å vere med på å arrangere sommarkonsertar, for ho får høyre mykje forskjellig musikk.
– Og så har eg har lært å lage lappar!
God tid til samtalar
Maja har også vore med som vertskap på «Åpen kirkestue», eit arrangement for eldre i Kirkestua like ved kyrkja i Randaberg Sentrum.
– Eg har likt å snakke med folk på arrangement, spesielt på Åpen kirkestue. Der er det god tid til samtalar og dei frammøtte har mykje å fortelje frå sine liv! Det tek eg med meg vidare.