Dagen vert markert andre søndag i november, som i år fell på 13. november, eller ein annan egna søndag som passar i kyrkjelyda.
Kyrkjeleg plikt
Kristne vert drepne og kidnappa i Nigeria, ofte utan at norsk presse omtalar tragedien. På Søndag for dei forfølgde løftar vi fram og ber for dei ofte gløymde forfølgde.
Det er mange grunnar til å markere Søndag for dei forfølgde i norske kyrkjelydar. Her er nokre av dei:
- I Pakistan vert kristne jenter og hindujenter kidnappa av muslimske menn som tvangskonverterer dei og tvingar dei til ekteskap. Stefanusalliansens partnar hjelper fleire av dei til fridom.
- I Nord-Korea vert kristne fengsla, mange vert stengde inne i dei mest berykta fangeleirane i landet, leirar for politiske fangar, der det knapt er råd å koma levande ut. Kristne som klarar å koma seg ut av Nord-Korea, fortel historiene sine gjennom Stefanusalliansens partnar, historier kyrkjelydar kan bruka til informasjon og forbøn.
- I India rettar hindunasjonalistiske valdsgrupper angrep både mot muslimar og kristne. Historiar får du gjennom Stefanusalliansens vener som stiller opp for folk som vert nekta trusfridom.
- I Tyrkia må små kristne kyrkjer leve under heilt andre vilkår enn det muslimske fleirtalet. Men kyrkjer rapporterer likevel om at nye kjem til tru. I Nord-Irak og Nord-Syria må kristne flykte for tyrkiske luftangrep mot kurdiske basar. I Irak og Syria kjempar folk seg tilbake til eit liv etter år med terror og brutal krig.
- I Sentral-Asia lever pastorar under et kraftig press frå miljøet rundt. Hos ein av Stefanusalliansens partnarar i eit anna, trygt, land får dei ein pustepause for å samle nye krefter.
Verdsomspennande markering
Søndag for dei forfølgde (SFF) vert markert i mange kyrkjer verda over. Her i landet brukar mange kyrkjelydar andre søndag i november. Men også andre søndagar kan nyttast. Det viktigaste er å bruka ein søndag til å spreie kunnskap, utfordra i forkynninga, gje ei gåve og la seg inspirere av menneske som lever i land der det verkeleg kostar å leve ut kristen tro.
Ekstra viktig i år
Nettopp i år kan det vera ein ekstra grunn til å markere Søndag for dei forfølgde. Ein del kyrkjer slit med at oppslutnaden om gudstenester har gått ned samanlikna med tida før pandemien som førte til stengde kyrkjer i periodar. Kanskje kan norske kyrkjelydar bli inspirerte av kristne i land som til dagleg møter restriksjonar? Kva kan iranske kristne som ikkje har eit lovleg gudshus å be i, lære norske kyrkjelydar om kor viktig fellesskap og gudsteneste er?
Utfordringa om å markere SFF går til alle kyrkjelydar i Den norske kyrkja og til alle frikyrkjer. Engasjementet på den aktuelle søndagen kan strekkje seg frå offer og informasjon under kunngjeringane, til å laga ei heil gudsteneste med vekt på temaet.
Tilgjengelege ressursar
Stefanusalliansen har laga gode ressursar for å markere SFF. På nettsida deira finner du
- Vitnesbyrd frå enkeltmenneske
- Artiklar om land
- Bøner og dikt
- Hjelp til å lage preike
- Forslag til heile gudstenester
- Filmar om forfølgde
- Salmar og songar både for Den norske kyrkja og frikyrkjer
- Opplegg til familiegudsteneste
- Tekstar om Stefanus, den første kristne martyren.
Med hjelp av ressursane på nettsida kan kyrkjelydar ha nok ressursar til ei god markering av Søndag for dei forfølgde. Kristne i mange land treng at vi stør dei og ber for dei – og let oss inspirere av deira vitnesbyrd.
For meir informasjon eller spørsmål, klikk dykk inn på ressursside for SFF eller ta kontakt på post@stefanus.no.