– Eg ser at samfunnet vårt er så hardt, på mange vis. Det er nådelaust, på mange måtar, med lite rom for å gjera feil. Difor velgjer eg meg verdien miskunn eller nåde, sa biskopen. Ho meinte at vi har høge forventningar til andre og oss sjølve. – Vi må streva mot å visa kvarandre nåde, og det er også ein kjerneverdi i den kristne trua.
Kultur- og likestillingsministeren fortalde at medarbeidarane hennar på førehand hadde sagt at sanning var ei god dygd å velgja til for ein minister med ansvar for ytringsfridom. Når også ho valde miskunn, forklarte ho det blant anna med at vi har blitt mindre snille som samfunn. – Vi er ofte forutinntatt, vi blir irriterte og prøver ikkje å forstå kvarandre. Det at eg som barn vart møtt med barmhjertighet, miskunn, av andre, var kjempeviktig for meg. Vi burde vera meir rause med kvarandre, sa kulturminister Lubna Jaffery.
Samtalen handla elles først om fremst om trua til dei to kvinnelege leiarane, men også om religion i vårt samfunn, kyrkje og kultur m.m.
Arrangmentet var ein av ei rekkje temakveldar der biskopen i Verdiåret 2024 inviterer til samtale med utgangspunkt i "Guds fire døtre/dei guddommelege søstrene" miskunn, rettferd, sanning og fred.