På siste dag av bispevisitasen i Sveio, trakk biskop Ragnhild mellom anna fram dei gode relasjonane kyrkja har til sine omgivnader i visitasforedraget:
- Noko eg særleg tar med meg frå desse dagane, er alle dei gode relasjonane de har til samarbeidspartnarane, til kulturen, til lag og organisasjonar, til skulane, til kommunen, til helse og omsorgssektoren. Ja, eg vil seie at Sveio på ein førebiletleg måte syner korleis eit lokalsamfunn må vere tufta på samhandling og gode relasjonar mellom oss for å vere ein god stad å bu.
(Du finn lenker til å høyre og/eller lese heile visitasforedraget nedst på sida).
Travle dagar
Biskop Ragnhild fekk vere med på mange møtestader i dagane ho vitja Sveio. Etter møte med staben i Sveio kyrkje i samtalar, gudsteneste og lunsj, var det bedriftsbesøk hjå Birkeland entreprenør. Dette er den største arbeidsgjevaren utanom kommunen i Sveio. Her fekk biskopen gode møte om helse, miljø og tryggleik og kor viktig det er å ha stabile arbeidsplassar i kommunen. Høgdepunktet var kan hende at biskopen sjølv fekk styre ein hjullastar.
Ved Ryvarden fyr vitja biskopen og følget minnesmerket etter Sleipnerulukka i 1999. Der mista 16 menneske livet då hurtigbåten Sleipner gjekk på grunn like utanfor. Ryvarden fyr er og ein av stadene som er godkjend for utandørs vigsel.
Kulturbygda Valestrand
Valestrand kallar seg kulturbygda Valestrand, og er ei bygd med mange kulturaktørar innan fleire kulturformer. Det var her komponisten Fartein Valen (1887-1952) budde i siste del av livet, og det var her han komponerte sine største verk. Biskopen og følget fekk omvising i komponistheimen Valenheimen av Fartein Valens etterkomar Fartein Valen-Sendstad.
Valen-Sendstad var og ein av dei som var på scenen på kulturkveld i Valestrand kulturkyrkje same kveld. I år kan ein feire at det er tjue år sidan denne kyrkja lengst nord i kommunen vart gjort om til kulturkyrkje. I tillegg til om lag 15 gudstenester i året, vert kyrkja nytta til konsertar og andre kulturelle aktivitetar. Denne kvelden fekk publikum høyre forfattarane Einar Økland og Agnes Ravatn lese eigne tekstar, korsong frå Valestrand mannskor, sjå innslag frå improteatergruppa TeARTig, performance-kunst frå Sigmund Skard og høyre klassisk musikk på orgel frå kantor Alie Hamberg.
Prostidag
Dagen etter var det møte med ordførar og rådmann på kommunehuset, før det var prostidag for heile Sunnhordland prosti. Prostiet har ein god tradisjon med årlege samlingar for alle kyrkjeleg tilsette. Biskopen har planar om at slike samlingar for heile prostia vil vere ein del av framtidige bispevisitasar. Alle sokneråda i Sunnhordland var og inviterte til middag, samt ei samling om mål og strategi og til gudsteneste i Sveio kyrkje.
Skulebesøk og gjenbruk
Alle elevane frå 1. til 10. trinn på Sveio skule fekk møte biskopen på fredagen. I fire puljar kom dei til auditoriet på skulen, der dei fekk høyre biskopen fortelje om kva ein biskop eigentleg er, og dei fekk stille dei spørsmåla dei lurte på. Etterpå var det lunsj på personalrommet på skulen, der det var samtale om skule- kyrkjesamarbeid.
Eit anna jubileum i Sveio kyrkjelyd i år, er tiårsmarkeringa av Gjenbruksløa. Denne bruktbutikken like ved E39 mellom Stavanger og Bergen har i løpet av desse ti åra hatt ein omsetjing på ni og ein halv million kroner. Dermed er det nye soknehuset i Sveio nedbetalt, og ein vil vidare ha midlar til ei ny diakonstilling – så sant kommunen betaler sin del av dette. Også eit misjonsprosjekt i Bangladesh får støtte frå midlane frå Gjenbruksløa. Biskop Ragnhild fekk vere med på feiringa av Gjenbruksløa, der det var helsingar frå kommunen, frå idéhavar sokneprest Arild Steinsland, idéplantar prost Svein Arne Theodorsen, dagleg leiar Per Bjørn Habbestad og biskopen sjølv.
Visitasgudsteneste og visitasforedrag
Søndag var det duka for gudsteneste i Sveio kyrkje, der Sveio barnekor var blant deltakarane. Biskopen si preike kan du sjå like nedanfor her. Du kan og lese og/eller høyre visitasforedraget ho held under kyrkjekaffien i soknehuset like etterpå ved å trykke på lenkene lenger nede på sida.