Starten på Gurispelet var at Peggy Kruse i 1989 skreiv eit tablå, «Fotefar i stein» til 800-års jubileet for gamle Edøy kyrkje. Frå dette tablået vaks spelet om Fru Guri av Edøy fram, og sidan 1990 har det blitt framført årleg, med unntak av nokre få år, mellom anna når Gurisenteret på Edøy blei bygd.
Som lærar i mange år hadde Peggy Kruse erfart at det elevane hugsa best frå skuleundervisninga var når dei fekk delta i ulike dramatiseringar. Med dette som utgangspunkt ønskte ho å lage eit skodespel til jubileumsfeiringa om kyrkja si rolle gjennom 800 år. Kjerneord i forestillinga er forsoning, fall og oppreising, håp og løfte om ein ny morgondag. Alt samanfatta i Nåden. To botnsolide element i spelet er den gamle kyrkja og Kulisteinen. Målet med prosjektet var å la dei unge få eit godt møte med evangeliet. Guri uttrykker i spelet at barna treng feste i fortida for å få ei god framtid. Vegen framover er vegen tilbake til orda vi fekk med oss.
Handlinga i spelet går føre seg på 1100-talet og er ei gripande historie om sterke kvinneskikkelsar i vikingtida. Om Fru Guri som den sterke personen som med klokskap leier familien gjennom tragedie og lykke, kjærleik, tvil og tru. Stykket bli omtalt som eit kvinnestykke, sidan det er eit av dei få spela i Noreg som har ei så tydeleg kvinneleg hovudrolle.
Fru Guri har blitt framstilt av kjente skodespelarar som Sylvia Salvesen, Hildegunn Eggen og Nina Woxholtt.
Spelet om Fru Guri av Edøy blir framført på Gurisenteret på Smøla i perioden 22.-25. juli.
Les meir om spelet her