Det var hovudspørsmålet då universitets- og høgskulemiljøa i regionen var vertskap for ein internasjonal forskingskonferanse om religion og berekraft.
Det Europeiske forskingsfellesskapet for naturvitskap og teologi (ESSSAT) hadde sin internasjonale forskingskonferanse i Ålesund 4. til 8. mai. ESSSAT er eit internasjonalt forskingsfellesskap som setjar samspelet mellom teologi og vitskap på agendaen. Temaet på årets konferanse var Global Sustainability- Science and Religion in Dialogue, og det blei diskutert kva rolle religionar kan spele i ei berekraftig samfunnsutvikling.
140 av verda sine fremste forskarar på feltet deltok, det same gjorde fleire prestar og religiøse leiarar. Mellom anna var 13 svenske biskopar, inkludert erkebiskop Antje Jackelén, til stades.
ESSSAT-konferansen blir kvar gong avslutta med økumenisk gudsteneste, og i år vart det open økumenisk gudsteneste i Ålesund kyrkje laurdag 7. mai. Biskop i Møre bispedømme, Ingeborg Midttømme, leia gudstenesta, saman med erkebiskop Jackelén frå Svenska kyrkja og Michael Fuller frå Church of Scotland.
Det var ei fin gudsteneste og ein flott avslutning på konferansen, som viste samhøyr og fellesskap i trua på tvers av landegrenser. Erkebiskop Antje Jeckelen haldt ei sterk og tankevekkande preike over «den kanaaneiske kvinnen» Matt. 15, 21- 28 og hennar insisterande og sterke tru «på tross». Erkebiskopen utfordra at vi i vår kamp mot klimaendringer måtte følge Den kanaaneiske kvinna sitt eksempel.
I 2019 vedtok Svenska kyrkan ein «Färdplan för klimatet» med mål om å bli klimanøytrale innan 2030. Kyrkjemøtet i Noreg vedtok same mål i fjor. Handlingsplanen 2022–2024 har då også fått tittelen «Meir himmel på ei trua jord».
