Fast givarteneste for søndagsskulen
Frå hausten 2021 ønskjer vi å tilsette ein prosjektmedarbeidar for søndagsskule i Osterfjorden i 20% stilling. Vi har allereie utlyst stillinga. Vi håpar at mange vil vere med å støtte dette med å gi eit fast beløp. Det er viktig å gi evangeliet til nye generasjonar.
Når ein skal planlegge nye tiltak, er det aller beste ei fast givarteneste, der mange forpliktar seg for eit fast beløp i året. Dette står ein sjølvsagt fritt til å endre når ein vil.
Vil du vere med? Meir praktisk informasjon kjem her etterkvart. Pr i dag kan du sende ein epost til post.osterfjorden@kyrkja.no og melde at du vil vere med.
Andre slag gåver?
Det er mange måtar å gi på. Ein kan gi av glede og takksemd. Ei alternativ bursdagsgåve for dei som «har alt». For å minnast nokon. I nokre gravferder er minnegåver like mykje ønska som blomar. Har ein ikkje livsarvingar, kan ein testamentere til ulike gode føremål. Og ein kan sjølvsagt gi einskildgåver til noko ein ønskjer å støtte.
Skattefritak for gåver
Gåver inntil 50 000,- kroner kan ein no få skattefritak for. Då må du oppgje personnummeret ditt, for at vi skal få sendt inn informasjonen til skattevesenet. Dette gjeld både faste gåver og eingongssummar, men ikkje anonyme gåver som offer. Send ein beskjed om at du ønsker skattefritak for gåva di til post.osterfjorden@kyrkja.no og hugs å sende inn gåva merka formål og namnet ditt.
Kyrkjeofringane (ofte kalla «kollekt»)
I kyrkja blir vi minna på at vi er forvaltarar av alt Gud har gitt oss. Her får ein høve til å gi til både misjon, naudhjelp, diakoni og mykje meir. Noko går til kyrkjelydsarbeidet lokalt. Alt frå 4-årsbøker til mat på samlingar vert dekka av dette.
Andre prosjekt som treng støtte
Kyrkja i Ostereidet treng ein kvit messehakel. Det er ei slag kappe presten tek på seg når han deler ut nattverd, og på høgtidsgudstenester. Vi har teikningar til ein fin, kvit messehakel frå kyrkja var ny, men hadde ikkje midlar den gongen. No håpar vi nokon vil hjelpe oss til å kome i mål. Vi har ikkje eksakt pris, men om lag 50.000,- for liknande kunsthandverk har vore nemnt.
Vi er alt i gang med å gjere inngangspartiet i kyrkja finare. Klesstativet vil bli bytta med ei fin knaggrekke, og vi har bede om pris på ein dekorasjon i inngangspartiet.
Vi vurderer og å pynte opp veggen til venstre for altaret, og har bede om forslag og skisser frå fagfolk.
Og vi er i gang med å opparbeide ein etterlengta parkeringsplass ved Hjelmås kapell. Når det skal lagast fortau der, blir det uråd å parkere langs vegen når det er gravferd, konfirmasjonar e.l. Dette siste prosjektet er vi godt i gang med, og gåver har kome inn frå gode sponsorar i næringslivet. Men vi treng meir for å fullføre prosjektet.
Takk for at du er med og støtter arbeidet!
Helsing Osterfjorden sokneråd