Vel møtt til gudsteneste på Blesen i Svilosen hos Sigrun og Kåre Espeseth kl. 11
Tradisjonen med gudsteneste oppi åsen Kristi himmelfartsdag, er lang og god.
I meir enn førti år har Bruflat kyrkjelyd hatt gudsteneste i Svilosen denne spesielle dagen i kyrkjeåret.
Dei siste tre åra, og mange gongar før, har møtestaden vore Blesen, men det har også vore gudstenester på Bergstølen, Juven og Garastølen.
Ti dagar etter Kristi himmelfartsdag feirar vi pinse.
1.pinsedag er det høgtidsgudsteneste i Bruflat kyrkje kl. 11, 2. Pinsedag – pinsegudsteneste på Brusveen i Smiugardsbygden kl. 11
KRISTI HIMMELFARTSDAG
Kristi himmelfartsdag feirar vi minnet om Jesu himmelfart, førti dagar etter påske.
Etter at Jesus har gjeve læresveinane sine misjonsbodet, blir Herren borte frå deira fysiske synsfelt. Dei ser han ikkje lenger, men han lovar å vere med dei:
«Sjå, eg er med dykk alle dagar så lenge verda står» Matt.28,20
Og Jesus ber dei vente på hjelp frå det høge. Vent i Jerusalem, sa han, så skal de få kraft når den Heilage Ande kjem. Han sikta til pinsehøgtida, ti dagar etter, og alt skjedde slik Jesus hadde sagt.
I fylgje apostelgjerningane (1,11) skal Jesus kome att på same måten som dei såg han fara opp til himmelen. To englar i kvite klede fortalde læresveinane dette like etter at ei sky hadde take han bort frå augo deira.