Gravferd

Døden kan vere vanskeleg å gripa. Det å mista nokon er tungt å ta inn over seg. Gravferda gjer døden og avskilet meir konkret. Å samlast om kista til takk og avskil er ein stoppestad på vegen gjennom sorga. Mange kjenner seg hjelpte av dei kjende rammene gravferdsgudstenesta gjev, og rommet som ligg i dei til å sørgja med andre. Ei kyrkjeleg gravferd er samstundes ei offentleg handling.

Det er ein fellesskap som markerer at eit liv er slutt. Ved avskilet syner vi respekt for den døde, for livet som har vore, og for liva som skal levast. I gravferda er det rom for gråt og klage, men òg takk og gode minne. I Fusa sokn kan du gravleggjast frå fem kyrkjer og på ni gravplassar, både i kiste og urne. For kontakt om gravferd eller bisetjing i Fusa, ring telefonnummeret nedst på sida - eller ta kontakt med gravferdsbyrå.