Ting har så mange meiningar og årsaker. Nokre av dei er meir skjulte enn andre.
Rogne kyrkje er ei åttekanta kyrkje. På nettet les eg at kyrkja vart bygd åttekanta av di ein då fekk nytta tømmeret betre. Ein fekk eit større rom ved hjelp av færre og kortare tømmerstokkar enn ved andre kyrkjeformer. Ein annan grunn er at kyrkja og vart stor og oversiktleg slik at alle kunne sjå presten på preikestolen og difor godt få høyrt Guds ord.
Men det ligg og ei djupare symbols meining i kyrkjeforma. Den åttekanta forma finn vi att i mange døypefontar og gravkapell. Det er eit symbol på vegen gjennom døden til det nye livet. Den kristne verda held den åttande dagen heilag fordi Jesus stod opp på denne dagen. Dette var den fyste dagen i den jødiske veka. Jødane held sabbaten; den sjuande dagen heilag fordi då kvilte Gud etter å ha skapt verda. Det er vår laurdag.
Altså er den åttande dagen ei ny byrjing, og vi feirar oppstode, håpet og det nye livet!
Åttekanta kyrkje; ein verdi til arbeidet som er meir enn økonomi og plassomsyn. Åttekanta kyrkje; noko å kjenne på når vi sit i Rogne kyrkje og allereie her har del i det evige livet.
Rogne kyrkje. Foto: Eli Vatn.