Ein feststemt kyrkjelyd var samla i Varhaug kyrkje då deira nye barne- og familieprest høgtideleg vart ordinert av Stavanger biskop.
– Kjære Jone, ta vare på det du har fått overgjeve! sa biskop Anne Lise Ådnøy til ordinanden, og viste til Paulus sine ord i 1. Tim. kapittel 1.
Biskopen trakk så opp dei store linjene frå disiplane og Paulus, fram til ordinasjonen i Varhaug kyrkje.
– Allereie rundt 20 år etter påsken var overleveringa i gang, og nå er me her, med ein presteson frå Sunnhordland som vil bli prest. Løftet du gir i dag kan likna det du ga då du svara ja til å elska og æra Berly. Ordinasjonsløftet inneheld eit stort alvor. Du har både mot og klokskap når du går inn i stillinga som barne- og familieprest, sa Ådnøy, og runda av med bibelverset som lenge har fylgt den ferske presten, Salme 37,5:
– Legg din veg i Herrens hand! Set di lit til han.