– Her er mange glade i kyrkja si

– Det som har slått oss er kor sterkt folkekyrkja står. Her er det mange som er glade i kyrkja si, og kyrkja når breitt ut i lokalsamfunnet, konstaterte biskop Anne Lise Ådnøy etter ei veke på Varhaug og Vigrestad.

Sundag heldt ho visitasforedraget, som er ei oppsummering og tilbakemelding etter besøket biskopen og medarbeiderane hennar har hatt i soknet. Her er litt av det Ådnøy sa:

– Toget og trafikken fér fort langs Jærkysten, men det er godt å stansa på Varhaug og Vigrestad og bli kjent med livet her. Denne veka har bygdene opna seg for oss. Me har møtt idrettslag, skular og kyrkjelyd. Me har helst på ordførar og kommuneleiing og dei som bur i Klokkarhagen. Me har vore på Spød og Drøs, høyrt gode refleksjonar i sokneråd og fellesråd og vore med når leiarar frå forsamlingane her har samla seg for å be.

Frå Jerusalem til Odland

Torsdag kveld romma kyrkja eit djup av levd liv, eller ein høg himmel, med jærkultur, lått og tru. Det var flott å merka gjenkjenning, lått og ettertanke då Sjur Håland og General Forsamling stilte med seg sjølv omgjevne av kyrkjeveggane. Me reiste frå Jerusalem til Odland i ord og tonar, via andredagsfest på misjonshuset, ekte kjensler og mange songar som like gjerne kunne kallast bøn. Ein ting er å seia at kyrkja har plass for alt livet rommar, ein annan ting er å oppleva det. Me treng eit trusspråk som viser livet som det er og ei evangelieforståing som gjer at folk ser at i «huset til Far min er det mange rom».

Skulane godt rusta for mangfald

Me har også møtt gode blikk på Klokkarhagen, der det finst omsorg for dei som igjen treng nokon rundt seg for å klara kvardagen. Me har møtt skular som legg godt til rette for at elevane skal få møta kristne tradisjonar og verdiar og læra seg å handtera mangfaldet i samfunnet. I skulen møtest heile samfunnet. Me ser at skulane her er godt rusta for å møta det mangfaldet me har i dag utan å rykka opp røtene. Elevane får sjanse til å ta vare på eigen identitet og læra seg å møta det og dei som er annleis.

Flott gudstenestearbeid

Hå kommune kjenner kyrkja godt og vil ho vel. Kommunen legg godt til rette for frivillige lag og organisasjonar. Leiarar, tilsette og frivillige står saman for å gjera kommunen til ein god stad å leva og får til mykje.

Denne kyrkjelyden har eit flott gudstenestearbeid, med mykje god involvering, godt fellesskap i kyrkjebenkane og mange fine tradisjonar i løpet av året. Kyrkjelyden syng og gler seg over å møtast, og det er mange som får oppleva at det gjev ein rikdom til liv og tru å setja av tid på sundagen til å møta kvarandre og han som gjev oss livet.

Her kan du lesa heile visitasforedraget som biskopen hadde etter visitasgudstenesta. 

Dele-knapper kan ikke vises uten at du samtykker til bruk av funksjonelle cookies. For å gjøre dette må du trykke på knappen helt nederst i venstre hjørne og marker sjekkboks for funksjonelle cookies og deretter klikke på "Oppdater samtykke". Evt. klikk på "Godta alle cookies" for å godta alle kategorier av cookies. Deretter må du laste siden på nytt.

Beklager, men vi kan ikke finne din posisjon pga instillingene i nettleseren din. Du må tillate autolokasjon for å kunne benytte denne funksjonaliteten:

Se instruksjoner for din nettlester under:

Internet explorer

Internet options / Privacy / Location / klikk på "Clear sites"

Chrome

Settings / Advanced / Priacy and security / Content settings / Location -> Fjern "kirken.no" fra blokkert-lista

Firefox

Options / søk etter "location" / settings / Fjern "Kirken.no" fra blokkert

Safari

Settings for this website / Location -> "Allow"