– Etter Holocaust vart det sagt «aldri meir», men diskriminering og hat mot jødar tok ikkje slutt. Tvert i mot, vi ser no ei auke i antisemittisme i mange land, også i Noreg. Difor er det viktig å markere Holocaust-dagen.
Det seier preses Olav Fykse Tveit som er den leiande biskopen i Den norske kyrkja.
27. januar 1945 vart konsentrasjonsleiren Auschwitz frigjeve. FN har difor valt denne datoen for å markere folkemordet på meir enn seks millionar jødar og fleire hundre tusen menneske av ulike minoritetar, under 2. verdskrigen.
– Holocaust-dagen er viktig for at vi aldri skal gløyme denne grufulle historia. Men dagen er og ei påminning om å sjå etter alle teikn, verbale og fysiske, til antisemittisme i vår tid, og i vårt samfunn, slik at vi kan motverke all diskriminering og hat.
Fykse Tveit understrekar at det er heile samfunnet sitt ansvar å sørge for at det er trygt å vere jøde i Noreg i dag.