På valentinsdagen, 14. februar, er det drop-in-bryllaup i 16 ulike kyrkjer. Går du med gifteplanar, kan du gifte deg på drop-in i Øyer, Ål, Nøtterøy, Ås, Ski, Askim, Ulsteinvik, Stryn, Flosta, Vågå, Egersund, Oddernes, Årnes, Halden, Flå og Uvdal.
Sjå oversikt på skjerikyrkja.no.
– Mange trur ar kyrkjebryllaup medfører fleire år med planlegging, to-tre kjolar og mange hundre gjestar. Men eit kyrkjebryllaup kan vere rimelig og enkelt, og samtidig like høgtideleg, vakkert og romantisk. På drop-in-bryllaup får par dette til eit vesentleg lågare budsjett – og ei mykje mindre klimabelastning.
Det seier leiar i Kyrkjerådet, Kristin Gunleiksrud Raaum.
Når ei kyrkje inviterer til drop-in-bryllaup, krevst det ingen påmelding. Fleire kyrkjer fortel likevel at mange par tek kontakt med kyrkja for å halde av tid, og gje sine ynskjer til song, musikk og tale.
Alle par som vil gifte seg må ha prøvingsattest frå Folkeregisteret. Denne viser at ein oppfyller krava til å inngå ekteskap. I følgje Skatteetaten vert nær halvparten av søknadane om prøvingsattest handsama automatisk. Desse para får dermed prøvingsattesten umiddelbart.