Fleire kyrkjelydar har gode erfaringar med å invitere til open dåpsdag. Her kan dei som ynskjer droppe innom, gjennomføre dåpssamtale og verte døypt.
Ein av dei som har erfaringar med drop-in-dåp er Fredrikstad domkyrkje, og sokneprest Endre Fyllingsnes fortel om gode tilbakemeldingar på dagen.
– Fleire barn av ikkje-medlemmer vart døypte, og dei vaksne i dåpsfølgjet fortalde etterpå at det gjorde eit uutsletteleg inntrykk å vere med på dette. Dei frivillige som hjelpte til sa at dette var den mest meiningsfulle dagen dei hadde hatt i kyrkja.
Nasjonal aksjon
Frå pinsa i 2023 og to veker inn i juni er det no planlagt ein periode med nasjonal merksemd om drop-in-dåp, som eit supplement til dåp i høgmesse.
– Vi vonar at så mange kyrkjer som mogeleg opnar for fleksible tidspunkt i desse to vekene neste vår, seier kyrkjerådsdirektør Ingrid Vad Nilsen
– På den måten får vi optimal effekt av den nasjonale og lokale marknadsføringa i fleire kanalar.
Det er perioden 27. mai til 11. juni som er sett av til å gjennomføre dåpsdagar. Vad Nilsen oppmodar til å ta dette med i planlegging av arbeidet for vårsemesteret 2023.
– Meir informasjon om aksjonen vil kome, og allereie no ligg det mykje materiell om dåpsformen i ressursbanken.no.