Seljumannamesse er ein av våre eldste kristne merkedagar, og blir feira kvart år rundt 8. juli på Selja og Kinn. Seljumannamesse er blant dei merkedagane som er nemnd i Kristenretten som St. Olav innførde på Moster i 1024, og finst i alle dei tidlege landskapslovene. Difor feirar vi no 1000 års-jubileum for Seljumannamesse i 2024.
Feiringa blir markert med ein jubileumsseglas mellom Florø, Selje, Måløy, Kalvåg og Kinn helga 5.-8. juli 2024 med veteranbåten m/s Atløy. Denne seglasen inngår som ein etappe i ein verdiseglas langs heile Kystpilegrimsleia 2024, og er også ein del av jubileumsstafetten fram mot Nasjonaljubileet Norge i 1000 år.
Det blir verdisamtalar, kulturprogram og folkefest på alle stoppestadene. I tillegg blir det arrangert keltisk pilegrimskonferanse på Fjordly fredag 5. juli kl. 17.00, laurdag blir det konsert i Selje kyrkje kl. 18.00, og det blir gudstenester både i Selje kloster og i Kinn gamle kyrkje. I Selje kloster er det gudsteneste søndag kl. 12.00 ved biskop Ragnhild, og i Kinn gamle kyrkje er gudstenesta måndag kl. 18.30.
Henta frå seljakloster.no